Auleria Wakudumo 

Omukunda Ohakweenyanga moshitukulwa shaShana otau ka kala u na oudano nomangeshefelo okodula okudja mo19 fiyo 21 Desemba neudo pokapale kavo komukunda pEeholongo. 

Etanga nomangeshefelo okwa lukilwa mwene womukunda waHakweenyanga, tatekulu Daniel Kayili. Ohali ufanwa Tatekulu D. Kayili Christmas Cup Tornament. 

Umwe womovakwateli komesho votournament ,  Pombili Katangolo okwa holola kutya neudo etango ola kwatelwa komesho koForecast Sports Betting oyo tai ka kwafela okuyandja oshimaliwa shovakufimbinga ovo va vena, oukutu yetanga, ounduda vokuningila omangeshefelo oshoyo okuuya naavo tava ka eta oshimwenyo poshindingili. 

Forecast Sports Betting okwa kufa ko oshinakuwanifwa eshi neudo noshili oshikando shitete Ohakweenyanga tai mono omukwafi momaudano. 

Omaudano ta aka kala ko ongaashi: etanga lokeemhadi, etanga lomokambaba hano onetball osho yo ovolleyball. 

Kakele komaudano, poshiindingili otapa ka kala yo omalihafifo taa e twa koForecast Sports Betting osho yo omaulikilo opaipindi. 

Etanga lokeemhadi otali lishangifwa koN$1 000, etanga lomokambaba otali lishangifwa koN$200 omanga ovolleyball tai lishangifwa koN$200. 

Ava tava ka vakula po onomola yotete metanga otava ka vena N$12 000 neembadi doshingoli 18, ponomola it ivali N$6 000 neembadi doshishiliveli 18, onomola it itatu N$3 000 neembadi dobronze 18. 

Omanga ava va vena etanga lomokambaba tali ka pewa N$750 neembadi doshingoli 10, N$ 500 neembadi doshishiliveli 10 oshoyo N$350 neembadi dobronze 10. Ovolleyball otai ka venwa oshimaliwa shi fike pamwe netanga lomokambaba okudja komuveni wotete fiyo owaxuuninwa. 

Forecast Sports Betting otai ka yandja yoo oifindanwa yonhumba komudani dingi, omukwati dingi, ongudu oyo ina omikalo dingi, nomushiki dingi. Ava otava ka pewa oN$200. 

Eshi oshili oshikando shititano omukunda waHakweenyanga tau ka kufa ombinga moudano wokomudo. 

Katangolo okwa ti oudano owa kala wa kwatelwa komesho komukulunhu wokakomisi ke li omhinge noulingilingi Paulus Noa, oo a kala nokuyambidida etanga lomomukunda wavo oshoyo ovanangeshefa vakwao pomudingonoko. 

Keshe ongudu tai li shangifa nai kwatafane novaunganeki vetanga keenomola deengodi tadi shikula: 0816095474 ile 0813832347. 

-wakudumoauleria@gmail.com