Omupresidente gwoshilongo Netumbo Nandi-Ndaitwah okwa kumagidha aaleli aape yiikandjohogololo osho wo yomalelo goondoolopa, ya longe nuudhiginini osho wo nuuyuuki.
Nandi-Ndaitwah okwa kumagidha ngaaka konima Swapo a sindana momahogololo ga li ko momasiku 26 gaNovomba nuumvo oshilongo ashihe.
“Ka longeni mwa itula mo opo mu lundulule onkalo yoshigwana shoka sha tula eyinekelo mune no ku mu hogolola,” ta kumagidha ngaaka.
Presidente okwa pandula sho omahogololo ga ende nawa osho wo nombili nokwa pandula wo oshigwana sho sha gandja elongelokumwe.
Ta ti, okuza ethimbo lyiigongi yokuxwaxwameka sigo esiku lyomagololo osho wo esiku lyiizemo, Aanamibia oyu ulike kutya oya hogolola ombili noya hala okukala nombili.“Onda hala wo okupandula aanambelewa yokomisi yomahogololo sho ya longo neyitulemo osho wo nelandulathano.
Onda hala okupandula etanga lyopolisi sho lya kaleke po elandulathano omasiku ngoka agehe,” ta pandula ngaaka. Nandi-Ndaitwah okwa pandula natango aatoolinkundana sho ya kala nokwaandjaneka uuyelele omasiku ngoka osho wo okutseyithila oshigwana kombinga yomayinyengo gomagololo moshilongo.
Nandi-Ndaitwah okwa pandula wo ookansela aape sho ya sindana nokumona oompito dhokulela oshigwana shaNamibia.
“Otandi pula Aanambia ayehe opo ya mange uukumwe okutunga nokuhumitha komeho oshilongo shika. Uuwanawa ohau holoka ashike ngele pe na elongelokumwe,” ta kumagidha ngaaka.
Okomisi yomahogololo oya pititha kutya, aantu ye li 752,043 oya li yi ishangitha okuhogolola ookansela yomalelo goondoolopa, ihe aantu ashike 272 942 ya hogolola, ya gandja oopelesenta 36.
“Ongundu Swapo oyi na oopelesenta 63 momahogololo guukansela yiikandjohogololo omanga mookansela yoondoolopa ya mono oopelesenta 52.4 oshilongo ashihe,” ECN a shanga ngaaka.