Taimi Haihambo
Ongwediva – Mayola wodoolopa yaNgwediva Tarah Shalyefu okwa ti omafiku aye a xuuninwa okukala mombelwa, nokulela elelodoolopa laNgwediva ongamayola osho e ya pexulilo.
Shalyefu oo a kala nokulelela odoolopa yaNgwediva oule weedula nhano okwa ti, olweendo laye lokulela odoolopa ola li liwa, nolietifa eenghono shaashi okwa kendabala lela okulonga nokweeta exumokomesho, osho yo okuwanifa po eemhumbwe dovanhu fiyo opondodo apa ta dulu.
“Moule weedula nhano onda kala nokulela Ovangwediva omo nda kendabala okumanifa eepoloyeka dihapu lela, noda pula oimalilwa ihapu,” ta ti.
Vati dimwe domudo ongaashi okweeta eepate doteya momapandavanda aNgwediva, osho sha kosha ongushu yeemilona N$10,5.
Okwa twikila kutya natango okwa kendabala okweeta omalusheno komalukanda, osho yo keenhele dihapu da ninga efimbo di li momilema.
“Natango onda kendabala nokufya oshisho kutya elelodoolopa ola fa ominino, dokupitila omeva aa haa kala a talama modoolopa pefimbo lodula, paife otaa kala haa dipilwa koshana,” ta ti.
Eepoloyeka dihapu okwa ti ongaashi okuyandja eepolota kovakalimo, okutunga omaumbo ovanhu ava hava mono oiyemo yopedu.
Shalyefu okwa twikila kutya nonande ongaho kape na ondjila ihe na omashongo. Naamwe omomashongo a kala nokutaalela melelo laye oulunga mOngwediva, edu lokuyandja eenhele dokutunga la pwa po, shaashi oovene vomapya inava hala okulandifa po omadu avo, nande hakeenghono.
Vati natango omahangano a pewa eekondalaka dokutunga eenhele dimwe domeni lodoolopa, fiyo opapa eenhele odo odi li ashike ofika.
Ashike nande ongaho Shalyefu okwa yelifa kutya okwa hala okupandula elelodoolopa laNgwediva, opamwe neekansela edi a longa nado, eshi va li ve lipaka mo moilonga yavo.
“Onda hala okutwa elelo lipe eli tali ya mo li longe nombili nonelitulemo. Longeleni kumwe noshiwana nawa noukumwe osho yo ohole yashili,” ta ti.