KATIMA MULILO – Yomuhulu wa sipokola mwasikiliti sa Zambezi Karel Theron, unyazizwe habutuku ki sicaba mwa sikiliti sa Zambezi, kaku kulubelwa kuli nanatile mupokola, kabaka la sebeliso maswe ya motikala ya sipokola. Taba yeo ibihiwa kuli ne ezahalile viki yefelile mwa ofesi ya Theron, teñi membala wa sipokola yabeleka mwaofesi yebatisisa litaba, nabizwe kuli ayo toloka kuli kiñi hane akwaeza motikala anze aliza mulumo wakuli uankufile. Lipaki libulela kuli natolokile kuli na ankufile, kakuli naisa situpu kwa libulukelo. Kono yomuhulu wa sipokola mwa sikiliti nasika amuhela toloko yeo, mi komano nezuhile mupokola hana bata kuzwa mwa ofesi. Theron ubihiwa kuli amufwemba kuli mane liapalo zahae zamusebezi zana tinile zapazuha, nekubulezi lipaki zasipokola. Kulumelwa kuli taba ne ezahezi babañwi babahulu ba sipokola batalimezi. Sibuabui wa sipokola Kauna Shikwambi, yana ize na utwile likakalezo zeo, naize siezwa use afile bupaki bwa hae. “Kacwalo nina ni sepo yakuli taba yeo ika batisiswa,” nabulezi kabukuswani mwakatilotilo kafa foni. Hana kupilwe kuikalabela Theron nasika lumela kapa kuhana likakalezo za nyazwa kazona. “Bona, hanikoni kubulela hala likakalezo mo libizo laka liambolwa. Batu bana ni makande abona.” Zeo halili cwalo yomuhulu wa sipokola sa naha swalelele, Anna-Marie Nainda nabulelezi New Era kuli taba ika batisiswa. “Kanako ya cwale yomuhulu wa sipokola mwa sikiliti naize nabuzize mupokola, kasamulaho akubiwa kuli nakwaeza motikala yelonga litupu kabusafa. Membala nakwaeza aliza mulumo wa kuli uankufile. Kacwalo nazwisize limotikala mwamukwakwa kamukwa omaswe, ili ono kona kutisa kozi. Kacwalo nabizizwe kamabaka awo, mi yomuhulu wa sipokola mwa sikiliti naize nasika swala mupokola famubili,” nekuhatelezi Nainda. “Kacwalo ni lemusizwe kuli mutayi uka talima mafosisa ahae. Yomuhulu wa sipokola hape ulela kukwalulela mupokola yomuñwi taba, yana ile famakepe akuikambota kumulwahaka hala taba yeo.