WINDOKO – Ofesi yebona za mabasi mwa sikiliti sa Zambezi, italimana ni butata bwa tiyeho mwakuñolisa baba pepwa. Tiyeho yeo itisa kuli ofesi italimane ni buñata bwa baba lyehile baba taha kuto ñolisa lipepo, kuli mane kutata kunyatela buniti bwa litaba zeo kuli mane haisi kueza lipatisiso, ili zetisa kulyeha mwakufa mapampili asipepo. Litaba za silimo sa 2019/2020 libonisa kuli mapampili asipepo ane afilwe kakulyeha, hala batu babana ni silimo ni kufita neli yemi fa 1 280. Mapampili abuizibahazo ane afilwe neli 2 319, mi bane bapepezwi kwa sipatela niku ñolwa neli 902. Mapampili asipepo ane afilwe kwaofesi ya sikiliti hala babana ni silimo kukuta fafasi neli 1 074. Zeo neli patuluzwi ki mubusisi wa sikiliti sa Zambezi Lawrence Sampofu, hane afa manzwi amayemo asikiliti viki yefelile. Liluko lisana ni mapampili abuizibahazo ase angile lilimolimo asa yongiwi. Mukoloko wa mabizo no ikabezwi ni bayemeli balilalanda, mi nofilwe kwa liofesi zeo kuli uyo hasanywa mwalilalanda. Palo ya mapampili abuizibahazo yene filwe ki 1 195 hala 1 793, mi a 598 hasika yongiwa kale. Sampofu nabulezi hape kuli ofesi italimana ni palo yetuna yabanana baba pepwa kwa bashemi besi bana banaha Namibia, babase bainzi mwanaha nako yetelele, kono habana mapampili abuizibahazo. “Buñata bwa bona sebafitelezi lilimo zelishumi kaze silezi, kono habakoni kutusiwa kakuli habana mapampili atokwahala,” nabulezi. Liluko hape litalimani ni kutokwa ofesi yetuna, mi kalulo yeo itepelezi kanako ya kakokwani ka Korona. Sampofu naize kacwalo kutata kuikema kwahule. Kutokwa lisebeliso ni kona ki butata, mi hape ofesi haina babeleki babañata. Butata bobuñwi ki kutokwa limotikala zekona kuya kwalibaka zamatakanyani.