Auleria Wakudumo
Ministeri, Sîsengu tsî !Nari!oabadi dib, Veikko Nekundib ge ǂhanusise ǁnā daob hîa ge ǂgaoǀkhādi !oa a !gâi!gâi!nâheb, ǀkharisi Daob 3633 hîa Tsandis !garo!āba, Omugulugwombashes !garo!ās ǀkha Omusati ǀkharib !nâ ra !hûǁareba ǂoa ge wekheb di Donertaxtsēs ai ge ǁkhowa-am. Nekundib ge mîsa !oab ge nē daoba !norasasiba !naris !nâ hā-ū, tsaraba ǀoroǀoro tsî Tsandis, Omugulugwombashes tsî ǂnamipeb ǁanǂgāsabena ǂhâbasa !oabade hōs !aroma nî !khōǂgāba. ǁKhātib ge nē daoba !oa!ū hâ ǂgâ-amsa Omugulugwombashe ǂÂiǂâisen!khaib !Gari-aon dib ǁga ra mā. Nē projeks hîa N$84.9 miljuns ai ra ǀnōhes ge Namibiab ǂHanub xa ǀoasase marisise ge mâ!gâhe. ǁAnǂgāsaben ǁnā !garo!ā!âgu din ge nēpa xu ge domdore, 198 aorekhoegu tsî tarekhoede sîsenmā, ǂai!gai!nande sarana ǀkhae tsîb ge kontaraktera ǁîb ǀkhāba xu ǂai!gaiǂgāba a !gâi!gâise.
Ministeri gere ǀgonǀgon!gaos ge, daogu omkhâis ǀgaisa !gao!gaoba !hūb sâuǁkhāsib !aroma ǁgui !khaisa. !Garo!ā ǁanǂgāsaben ge !gâi!gâisa daogu xa ra !aromahese nau !kharaga ǀhûhâsigu khoen ǀkha !hûǁare tsî ǂguina ǁî!nāpe ra ǁkhāǁkhāsen, ǂandi tsî ǁkhāsigu mā!khunidi !nâ-ū. Ai!âb ministera gere mîs ge, nē projeks di dītoahes ra ǂhanub di ǁgūbas hîa daoga ǂgaoǀkhādi !oagu !garo!ā !âgu !nâ omkhâisa ǀgū !khaisa, hoa ǁanǂgāsabena ǂhâbasa !oabade mās ase. ǂHanub ge nî ai!gû, projekdi ǁaeb ai nî dītoahe !khaisa ǁawoǁawos ǀkha 2030 Mûǂuib ǁgūbasa sī!nâs hîa !naris !aroma a !norasa daoga !hūb a ǂhabase !garo!ādi tsî kai !ādi ǀhûhâsiga mās ai hâsa.
Aiǂnû-aob, Daogu ǂGaeǂguis ǀAwemā!nans dib, Martins Kambulub ge ǁkhā ǁaxasib tawa ǀGamǁî !âb Tsandi-Onesi-Epalela Daob dib ǂnamipe gere ǂanǂan. “Nē-i ge kai aiǂhanu-e nētsē sadu ai!â hā mâs di-e. Sadu ǀhûhâsib di mâǀhaos tsî ǁawosase mâ!gâs ge nē projeks di !gâi!gâba ge !aroma. Sada ge nēpa nētsē ǀhao hâ, hoada !â-e ǀhuru!nâ hâ hâ projeks di ǀgamǁî !haros ǀkha da ǂhanusise nî ǂnāǁnâ tsî Tsandi-Onesi-Epalela daob disa tsoatsoa-ūse,” tib ge ge mî. ǁÎb ge ǀhûhâsiba, !nū!nâxasib tsî mâhaos !aroma gangansa gere mā. Omusatib ǀkharisi mûǂamaob, Immanuel Shikongob gere mîba nî !khais ge daob di toas ǀguis ais !âubasensa hâ tama hâsa, xawes nēsa ǁîn di khoesisa omkhâi tsî naun ǀkha supuse !hûǁares tsîna nî īǁkhā kai !khaisa.