Auleria Wakudumo
Omupresidente Netumbo Nandi- Ndaitwah okwa ulika Modestus Amutse oye a ninge minista weemina noikwanghono okudja 2 Desemba 2025.
Amutse okwa ulikwa a ninge minista she likolelela kokatendo 35 kekotamhango loshilongo oko haka yandje eenghono komupresidente opo a ulike eeminista okudja momutumba wopashiwana opo va dule okuwanifwa po oinakuwanifwa yepangelo mouministeli omo tava tulwa.
Amutse oku na owino mokulonga moimhungu yepangelo. Okwa li nale omupeduminista mouministeli wouyelele nomakwatafano. Manga ina tulwa koshiteelinga shoikwamina, Amutse oku li oshilyo shomutumba wopashiwana. Owino yaye mekwatelokomesho loilonga yepangelo moitukulwa nalo ole mu pa omhito iwa okukala a pewa oshinakuwanifwa shominista.
Presidente okwa holola olupandu kominista yetanga leameno Frans Kapofi eshi a kala ta kwafele ouministeli weemina oule weemwedi da ya. Okwa ti okwa pandula elitulemo laye moilonga oyo kwa li e linekelelwa ekwatelokomesho mokukwafa ouministeli weemina manga wa li u li momhumbwe.
Kapofi okwa li a ulikwa komupresidente opo a kwafele pakafimbo, sha landula eshi ou a li nale minitsa yeemina noikwanghono Natangwe Ithete a kufwa moilonga.
Presidente okwa li a koleka mo29 Kotoba 2025 kutya Ithete okwa kufwa moilonga molwaashi a tauluka naina landula omulandu oo wa tulwa po kombelewa yomupresidente eshi a ka ninga eemhangela domahooli.
Ithete okwa kanifa oilonga ongaminista weemina noikwanghono, omupeduprima woshilongo osho yo oshipundi shaye mokokabinete.
Konima eshi Ithete a dja moilonga, Nandi- Ndaitwah okwa li e likwatela ko ye mwene oye a ninge omutwe weemina nokonima okwe ke lineekelela oshinakuwanifwa osho kominista yetanga leameno Frans Kapofi oo a tulwa po a kwafele oule wefimbo fiyo onghela eshi a ulika minista mupe Modestus Amutse.
Nandi-Ndaitwah okwa holola kutya euliko laminista mupe ole ya pefimbo la finana, sha landula omahoololo oukansela novaleli veedoolopa oo a li a ningwa mo26 Novemba.
“Ohandi halele minista mupe eenghono moilonga yaye ipe opo a dule okukwatela komesho nokulela ouministeli nondjungu, ye a dule okutwala oshilongo pombada moikumungu yomanduluko, a nghonopaleke eemina nokuxumifa komesho oitukulwa aishe 14 moshilongo,” Omupresidente ta holola ngaho. -wakudumoauleria@gmail.com