Omulilo ngoka gwa thigi aaniilonga yehangano lyoNamibia Wildlife Resorts (NWR) ye li 50 powala, ogwa faalele wo omwenyo gohanona yomimvo mbali, ya pile mondunda. 

Sha ikolelela kuuyelele wa pitithwa kuuministeli womauyelele nomakwatathano gopaungomba moshitopolwa shaHardap, omulilo ngoka ogwa fike po omalukalwa gaaniilonga ge li 50, oohauto mbali osho wo omalukalwa ngoka kwa li taga tamekwa okutungwa. 

Otaku hokololwa kutya iinima ayihe oya pila mo inamu za nando osha. 

“Pethimbo ndyoka opolisi ya thiki poshiningwanima, kapwa li pe na natango uuyelele kutya omulilo ngoka ogwa li gwa etwa koshike,” Uuministeli wa shanga ngaaka. 

Oomwedhi mbali dha piti, aanona yaali ye na omimvo gumwe osho wo ne oya si sho anuwa ya pile mondunda. Sha ikolela kopolisi moshitopolwa shErongo oshiningwanima osha holoka kolukanda DRC koSwakopmund moshitopolwa shErongo. 

Otaku hokololwa kutya omulumentu gumwe okwa li a kotha sho a papudhuka moomposi komulilo gu li mondunda ye, e ta matukile pondje. 

Sho anuwa a yi pondje, okwa mono ishewe omulilo tagu fike ombashu yopuushiinda, hoka a li a matukile, nokukambadhala okuteya po omweelo. 

Opolisi oya ti, omulumentu ngoka okwa li ashike a pondola okuhupitha okanona komimvo heyali. 

Otaku hokololwa kutya yina yaanona ka li mo megumbo ethimbo lyoshiningwanima naashoka sha eta omulilo inashi tseyika natango. 

Moshiningwanima shimwe, omulumentu gwomimvo 31 okwa si sho a pile mondunda kOutjo sho a li ta kambandhala okuhupitha aanona yaali mboka ya li mondunda tayi pi. 

Otaku hokololwa kutya nonando a li e shi pondola okuhupitha aanona mboka okwa li a shuna mo ishewe moka ina za we. 

Natango oomwedhi dha yi, aantu ye vule po50 oya li ya thigwa powala koHavana moWindhoek, sho omulilo anuwa gwa fike po oombashu ndhoka thiluthilu, no inaku tseyika kutya omulilo ogwa etwa koshike. 

Opolisi oya lopota kutya nonando oshigwana sha kala nokukambadhala okudhima omulilo ngoka inashi pondola sha, kadhimamulilo sho a ka thika oombashu odha pya po nale. 

Opolisi oya kala nokukumagidha oshigwana shi kale aluhe tashi dhimi thiluthilu omililo uuna sha mana oku gu longitha, yo ya kwashipaleke kutya itagu vulu okweeta oshiponga. 

-vkaapanda@nepc.com.na