Opolisi moshitopolwa shaShana oyi li molukongo lwomulumentu gwomimvo 50 ngoka anuwa a kwata koonkondo okanona kokakadhona komimvo 12, okanona komukiintu gwe gwopayihole.
Sha ikolela kepeko lyopolisi oshiningwanima shoka anuwa osha holoka muNovemba ihe osha lopotwa ashike oshiwike shika, kOkandjengedi mOshakati.
Otaku hokololwa kutya yina yokanona anuwa okwa li e li pondje, sho omulumentu ngoka a iyakele mondunda omanga okanona ka kotha e te ka kwata koonkondo.
Opolisi oya ti oyi li molukongo lwomulumentu ngoka.
Oshiningwanima saha faathana, opolisi moshitopolwa shOmusati oya kala molukongo lwomulumentu ngoka anuwa a kwata koonkondo okanona komuholike gwe gopayihole, komimvo 12. Sha ikwatelela kiiningwanima ya holoka mehuliloshiwike oshiningwanima shoka osha holoka momukunda Omakolombongo moshikandjohogololo Anamulenge.
Otaku hokololwa kutya okanona hoka kokakadhona anuwa oka li ka kwatwa koonkondo komulumentu gwayina. Okakadhona hoka anuwa oka li ka lala mondunda, moka omulumentu ngoka a li a yi e ta tameke oku ka pampadhala.
Sho anuwa ka papudhuka mo moomposi, omulumentu ngoka anuwa okwe ka lombwele ka mwene e te ka mbandameke noku ka kwata koonkondo.
Ethimbo oshiningwanima shoka sha holoka yina yokanona anuwa okwa li a za mo a yi kefumbiko.
Opolisi moshilongo otayi lopota omakwatokoonkondo gesiku kehe, ngoka ga eta uumbanda mokati koshigwana oshoka otaga ningilwa kehe gumwe okutameka koohanona sigo okaakulupe osho wo aanuulema.
Omakwatokoonkondo otaga lopotwa taga ningilwa aantu ayehe, kaashi na omulumentu nenge omukiintu.
Opolisi oya kala nokukumagidha oshigwana shi kale tashi lopota meendelelo uuna sha longelwa omiyonena, opo aafekelwa ya vule okumangwa mbala.
Omasiku ngaka ga zi ko, omukulupe gwomimvo 72 okwa mangwa po kopolisi moshitopolwa shaKavango West sho anuwa a kwata koonkondo omwanagona gomimvo 16. Sha ikolelela kiiningwanima ya holoka mehuliloshiwike, oshiningwanima shoka anuwa osha holoka Olyomakaya momukunda Sikali.
Otaku hokololwa kutya omukulupe ngoka okwa li a adhikililwa kuyina yokakadhona hoka, te ka longele iilonga inaayi uka, e ta lopotele opolisi.
-vkaapanda@nepc.com.na