Auleria Wakudumo 

Ongwediva- Omushikingalo Penehafo Likius a shiivika nawa nedina lomondabo Latoya Stella oo a shika ongalo ya kufa vahapu koipundi ‘my pace oshoyo commando okwa li a ulika oshitalendi shaye onguloshi yOlomakaya konhele yomalihafifo hai ifanwa Club Ace mOngwediva. 

Latoya okwa li a mwenyeka oshiwana osho shali sha holka momwaalu muhapu moClub Ace. Oshiwana osha kala sha teelela Latoya fiyo okeengulasha, sha hala okutala nghene efamba tali imbi nondaka yalo yafa okaxumba loo tali li nyenge nomunhu ehena makipa. 

Oufiku ou okwa li wa fiya vahapu nenyanyu, tave li nyenge voo tava imbile pamwe nomushikingalo. Vahapu ovo ovali navo tava holola oitalendi yavo, umwe oto hale kutya mutu navo ovali vena okuninga ovashikingalo ile ovandaanishi navo. 

Eshi Latoya a ya komesho, ina fiya nande oumwe omutumba, ou ta nhuka, ou ta daanisa, ou ta imbi nomwaau ngaho ta kuwu onghuwo shaashi ehafo olali mbishi meumbo mwa tomwa. 

Latoya okwa li a nyanyuna ovalanduli vaye neengalo nhatu, ‘commando, antenna oshoyo obinna oo eli mopula fiyo opapa. 

Umwe womomunafikola wokoshiputudilo shopombada, Elizabeth Noah okwa ti efimbo el iolo efimbo liwa okukatala ovashingingalo nokuli udifa nawa shaashi oveli mefudo. 

Noah okwa holola okwa holola olupandu koClub Ace eshi ya unganeka Latoya euye okuvapa mo mokakola kaye. 

“Ovashingingalo vepupi letu ohava kala ashike unene koWindhoek, ondi wete sha fimana ngeenge eenhele domalihafifo dihapu oda hovele okukala tadi ifana ovashikingalo ovo veli mopula opo tu hafele yoo pamwe navo,” ta ti ngaho. 

Noah okwa ti okushi oungalo vaLatoya aveshe momutwe. Okwa ti ohemu landula yoo komapandja opaungoba aeshe shaashi okumuhole tai pumo. Noah okwa ti oshili oshikando shotete ta mono omushikingalo waye wotete.  -wakudumoauleria@gmail.com