!Hūb di ǁûs, Netumbo Nandi-Ndaitwahs ge ǂoa ge wekheb di Denstaxtsēs ai, SADCs di dana sîsenǂui ra sekretareb, Elias Magosiba xu khoexa!nâ sarisa ge !khō!oa. Magosib ge mîs ge ǁîb di saris NNNsa ǀkharib mâ ǀgaub !nâ hâs xa mâi-ai!â tsî ǁkhāti ǁîba Namibiab tarena aimâi hâ SADCs ǁgūbade sī!nâs !aromas tsîna ǁnâu!ās ai hâsa.
ǁKhātib ai!â ǀkharisi !amǂgāsase sîsensa ǀgaiǀgais, ǂkhîb tsî ǁawosasiba ǁani !hūgu ǁaegu ǁawoǁawos tsîna ra ǁkhorese. !Hūb di ǁûs, Netumbo Nandi-Ndaitwahs ge mîs ge, Namibiab ra SADCsa ǂhâǂhâsa ǂgurihaib !hūsâuǁkhāsib tsî ǂgiǂgosi ǁawosasib !aroma mû !khaisa. ǁNāpas ge Namibiab nî ai!gû tsî nē sîsenǁareba ǀgaiǀgai !khaisa gere ǀgonǀgon!gaose. “Namibiab ge ǂhâǂhâsasib sada ǂnûiǂgās sîsengu diba ra !gôa!gâ, ǀkharisi !amǂgāsens tsî ǁkhāti ǂkhîb tsî ǁawosasib !âb tsîkha hoakha ǂnamipe,” tis ge ge mî, ǁîbas gere ǁkhoreǁhare soab ai. ǁÎs ge ge mî, nē ǂnûs ge kaise ǂhâbasa !ēsa hā-ū !khaisa, ǁîs ge ǀkharib !nân tarena ra ī tsî mâti ra ai!gûs ǂnamipe gere ǂanǂanhe, nē berosas ge ū!khunis khao!gâ. “ǁNâu ta ge sa saris xa, o ta ge kaise a !gâi ǂhôa-i ge, i ta ǀkharib di sâuǁkhāsib tsî ǂgiǂgosi aikha ai !gāsasiba nî hōse i,” tis ge ge mî. “Ti !ereamxasib ge sas ra mû ǂgao dana xūna ǂanǂui tsî ǀgoragusa, ǁkhāti nî ǁawoǁawose isa, ǀkharib ǁnopetamase mā tsî !amǂgāsas hîa da ge mîǁguisa sī!nâ hâsa,” tib ge Magosiba !Hūb di ûsa ge mîba.
Ti beros di ǁkhāti a !ereamxasib ge sîsenxasiga ǂkhâ!nâ tsî !gûǁnâsa ǁawoǁawosa. Ai!âb ge ǁîba Nandi-Ndaitwahs di gaxu kuriga !khōǂgā hâ ǂan tsî hō!âs ǀkharisi ǁhōn ǂnamipesa gere ǂan!gâ. “Sas ge ǀasa !ereamsa nēsi tani hâ, tsî ta ge ǁau!gôa tama hâ , sa ǂans tsî ǁkhāsigu ǀkharib ǂnamipes ūhâga. Ti hās nēpas ge sasa khao!hūba mā tsî tita tsîna ǀawemāhesa,” tib ge Magosiba ge mî.