OHANGWENA – Oshitukulwa shaHangwena osha lopota omivalu dovanhu va kwatwa kombuto yo-HIV/AIDS wa shuna pedu mokufaafanifa nomido da pita.
Eshi tashi ulike kutya epangelo otali longo noudiinini okukandeka omikifi da yooloka moshilongo.
Edi oda popiwa komukulunhuwiliki wouhaku moshitukulwa shaHangwena Robert Nandjila pefimbo kwa li tava dimbuluka efiku lombuto yo-HIV/AIDS la dimbulukiwa komukunda Onanghulo Etivali.
Ovanhu va dja koikandjohoololo ya yooloka mOhangwena okwa li va holoka momwaalu muhapu okuyandja omatumwalaka omukumo kovanhu ovo tava lumbu nomukifi wo-HIV/AIDS.
Efiku eli ohali dimbulukiwa omudo keshe mefiku lotete laDesemba okuyandja omukumo koshiwana sha kwatwa kombuto molwaashi otashi va kwafele okukala ve na omukumo wokutwikila okunwa omiti davo.
Omukulunhuwiliki wouhaku Nandjila okwa popya ta ti ovanhu ashike 591 va monika ombuto yoHIV\AIDS neudo konima eshi va ningilwa omakonakono.
Okwa yelifa omudo wa dja ko ovanhu 781 ova monika ombuto yo-HIV/AIDS osho tashi ulike kutya omudo wa dja ko omivalu okwa li di li pombada.
Okwa weda po ta ti oshitukulwa shaHangwena paife oshi na omivalu dovanhu aveshe kumwe 29 159 va kwatwa kombuto yo-HIV/AIDS.
“Ngeenge omivalu dovanhu tava kwatwa kombuto tadi shuna pedu otashi ulike kutya epangelo otali longo nelitulemo okukelela omikifi da yooloka,” ta ti.
Okwa ti koipangelo yakula osho yo koupangelo vashona oku na ovanambelewa youndjolowele tava yandje ehongo efiku keshe kombinga nghene ovanhu ve na okuliamena kombuto.
Nandjila okwa kumaida ovanhu ve li kepango lomikifi da yooloka opo va twikile okunwa omiti davo noudiinini shaashi osha fimana opo va kale nomwenyo.
“Ovanhu nava ka ningilwe omakonakono omikifi da yooloka shaashi osha fimana okukala ve shi shi kutya ova fikama peni,“ ta ti.
Okwa kumaida oshiwana opo shiha ningile ovanhu va kwatwa kombuto yo-HIV/AIDS okatongo molwaashi osha puka.