Ofamili yomukulupe weedula 66 ou a monifwa oshiponga nomakatana komonamati waye, oya hokolola tai ti efiku olo omufekelwa okwa fiilwa oikulya ashike mboli ina tala nawa eshi a fika meumbo shaashi kwa li a kolwa. 

Omukulupe ou okwa tambulilwa moshipangelo shaShakati ta mono epango konima eshi a tetwa nomakatana komonamati weedula 34 shaashi vati ina fiilwa mo oikulya. Oshiningwanima osha ningwa Etitano efimbo loufiku komukunda Oshihenge moshitukulwa shaShana. Omufekelwa okwa anyenwa omhito yokulifutila mo modolongo eshi a holoka momhangu yamengestalata waShakati Etitatu. Oshibofa shaye osha undulilwa komafiku 20 Juli 2026. Omupopiliko wopolifi koshikondo shokukonakona oimbuluma mOshana omupedukomufala Fredrick Ndjadila okwa koleka oshiningwanima eshi. 

Opolifi oya hokolola tai ti efiku olo omufekelwa ou e li omukwashiwana waAngola okwa dja keendingosho a kolwa. 

Okwa ya kepata opo a tale ngeenge okwa fiilwa mo oikulya ashike efiku olo okwa li a fiilwa mo ndele mboli ka kwa li a tala nawa kutya oikulya oi li peni. 

Umwe womumwainakadona a dalwa nomufekelwa okwa hokolola ta ti, omulumenhu ou okwa ya konduda oko kwa li kwa nangala meme vavo ndele te mu pula kutya omolwashike ine mu fiila ouvalelo. “Okwa teya po omuvelo wonduda ya meme ndele tai mo. Okwa kufa ekatana ndele te mu tete nokeenyala,” ta hokolola. 

Okwa ti okudja opo ova penduka ndele tava ka lopotela ovashiinda fiyo opolifi tai fiki. 

Natango opolifi, oya koleka tai ti konima ashike yokafimbo omufekelwa okwa ya monduda omo kwa li mwa nangala ounona ndele ta kwata okaana keedula 10 onghonga. Opolifi oya hokolola kutya natango omwedi wa dja ko omulumenhu ou okwa kwata okaana onghonga kambulavo keedula omuwoi. Okaana inake shi lopota shaashi okwa li ka ningilwa omatilifo kutya ota ka dipawa ngeenge oka lombwele ovaneumbo. 

Opolifi oya ti okaana oka lopotela opolifi efiku olo kutya mboli nako okwa li ka kwatwa onghonga. 

Ofamili oya hokolola tai ti inai didilika omufekelwa e na oupyakadi wopamadiladilo ashike okuhole okutanguna ngeenge a dja keendingosho. 

Oya hokolola tai ti omulumenhu ou omukwashiwana waAngola shaashi xe omuAngola nokwa dalelwa koAngola, ye kena sha oufemba ashike ina omuNamibia. 

-fhamalwa@nepc.com.na