ONGWEDIVA – Simon Nakapolo a shivika nawa DJ Mashaba okwa ti okuhole okudana eengalo poivilo yomalihafifo molwaashi oku na ounongo nohokwe yokuhafifa ovanhu neengalo.
DJ Mashaba okwa ti ngeenge owa hange ta dana eengalo omunhu keshe oha kala te linyenge e udite ombili nokwiimba.
“Ohandi dana eengalo odo di holike kovanhu. Ovanhu ovo vashima ngeenge ova udu handi dana eengalo ohava tameka okulinyenge shaashi eengalo odiwa odo otadi tula omadilaadilo ponhele,” ta ti.
Omulumenhu okwa ti okwa tameka okulonga oilonga you-DJ okudja omudo 2015 konima eshi a mona kutya okwa pumbwa okulongifa ounongo waye. Okwa ti oku na oilongifo yaye mwene mwa kwatelwa omambako.
“Ohandi xupu ashike mongeshefa yaye you-DJ. Ohandi ende koivilo yomalihafifo ya yooloka ngaashi omafundula, omashasho, omadalo osho yo oindingili hai kala keendingosho,”ta ti. Okwa ti ongeshefa yaye oya lundulula onghalamwenyo yaye molwashi paife oha dulu okuyambidida ofamili yaye osho yo okufutila ounona vaye ofikola. DJ Mashaba okwa hokolola ta ti oilonga you DJ oiwa unene shaashi ohai mu etele oyuuyemo yoshimaliwa shihapu. “Efiku keshe ovanhu otava dengelenge eengodi tava pula nge opo ndi ye koivilo yavo ndi ka dane eenngalo. Oha shi penge omukumu wokulonga nondjungu,” ta ti.
Okwa ti ota twikile okukala ta ya kula nawa oshiwana molwashi otashi yandje omukumo kovanhu opo natango ve mu dengele mongula.
“Ondi na omambako oo ha dulu okulongifwa koivilo ya yooloka kovanhu ovo va pumbwa ashike okulongifa omambako ndele oha eengalo,” ta ti.
DJ Mashaba okwa ti okwa yandja eemhito doilonga kovanyasha vane ha mu kwafele ngeenge ta ka longela keenhele dokokule.
Okwa kumaida ovanyasha opo va twikile okulongifa ounongo wavo molwashi otashi va e tele oyuuyemo.
DJ Mashaba ota monika mOndangwa kolukanda Okangwena.