Auleria Wakudumo
Epangelo ola hovela okuandjaneka omambakumbaku moitukulwa ya yooloka koshitopolwa shokonooli yoshilongo. Omambakumbaku okwa hovela nale okupulula, sha landula eshi Shihenga shaNangobe ya tilila omeva a wana pedu.
Ngoloneya woshitukulwa shaShana Hofni Iipinge okwa holola kutya ombelewa yaye oye lilongekida melongelokumwe noumisteli wounamapya nounaimuna okukwashilipaleka kutya ovakwashiwana ova mona ekwafo la wana pefimbo eli leendima.
“Oshitukulwa shetu osha mona omambakumbaku 18. Omambakumbaku aa aeshe okwa tumwa nale koikandjohoololo 11 yomoshitukulwa. Oshikandjohoololo keshe osha mona omambakumbaku avali,” Ngoloneya ta holola ngaho.
Iipinge okwa holola yo kutya otava twikile okulongela kumwe nouministeli wounamapya koshikondo shokupangela omambakumbaku opo va pewe amwe natango. Okwa ti ova hovela nale nokuli okulongekida omambakumbaku a wedwa po opo a wedele oo e li nale koikandjohoololo. Eshi otashi ningwa opo oshiwana shiha kale sha teelela omambakumbaku oule wefimbo momusholondondo. Ngoloneya okwa ti elalakano okukala ve na nande omambakumbaku anhe moshikandjohoololo.
“Ngeenge owa ende momikunda moshitukulwa shetu, oto mono kutya vahapu ova hovela nale okutula eembuto medu. Natango, ohandi tu omukumo unene ovakulupe osho yo ovanyasha ovo itava dulu okufuta omambakumbaku opaumwene opo va longife omambakumbaku epangelo,” Iipinge ta ti.
Ombakumbaku epangelo ohaa kosho oshimaliwa shi fike poN$360 mohekta imwe.
Ngoloneya okwa holola kutya Omupresidente woshilongo Netumbo Nandi- Ndaitwah okwa ti oshiwana nashi kondje nokulwifa ondjala noluhepo mokulonga oikulya yaw ana kutya otaib dilile momapya ile omoukunino vokonima yomaumbo.
Okwa ti eshi otashi kwafele okushakeneka epangelo ondjilakati. Epangelo otali mono yo omhito iwa okulongifa oshimaliwa osho hashi longifwa moikulya yoshikukuta okulongifa mouhaku, eepate ile meemhumbwe dimwe da wedwa po.
“Eembuto nado otadi monika peembelewa dookansela moikandjohooololo ya yooloka. Moikandjohoololo imwe, eembuto oda hovelwa nale okutwalwa moshiwana omwedi wad ja ko,” Ngoloneya ta ti ngaho.
Iipinge okwa weda po oshitwa shomeva osho nasho sha fimana pefimbo apa. Ngoloneya okwa indila oshiwana opo shi pungule omeva odula.
“Oshiwana otashi dulu okuyakela omeva aa opo a dule okulongifwa kohainga. Omeva kutya ookunwa ile pamwe okulongifwa ngaashi okutekela oikunino nokukosha okwa pumbwa okupungulwa paife manga omeva ahapu,” Iipinge ta lombwele oshiwana ngaho.
Kansela woshikandjohoololo shaKongo Efraim Shipindo okwa holola kutya navo oveli longekida netemo olili nale momupini mOkongo.
Shipindo okwa ti omambakumbaku epangelo okwa hovela nale okupulula. Shipindo okwa pandula ovadinwanhu, ovayelele moshitukulwa shaye eshi va hovela okupulula nokufila oinamwenyo yavo oy ova pewa oshisho. Okwa ti ovanhu vahapu ova otava longifa omambakumbaku epangelo shaashi oku na ombilixa.
“Osheetifa eenghono okumona keshe umwe ta kondjifa ondjala noluhepo moshikandjohoololo shetu, mwa kwatelwa ovo va talika ko kutya ovanhu ihava pungula,” Shipindo ta holola ngaho.
-wakudumoauleria@gmail.com