Auleria Wakudumo
Okongo Community Forest oyo i na eeproyeka nhatu, oproyeka yokunduluka oihongomwa, oproyeka yoihape noingumutulu osho yo oproyeka yeexuxwa otai yandje olupandu moshiwana mokuyandja omakwafo a yooloka.
Oproyeka yokunduluka oihongomwa oya yandja ekwafo kovadinwanhu moshikandjohoololo shaKongo. Oproyeka oya yandja ekwafo leedalate deeshipa, eedalate deengonga, omiti doikombo, oikwatelwa yomomaumbo ngaashi omavela, oiyaxa, okufuta ovanailonga ovo tava ka kokola epya nokunana odalate yavo.
Omukulunhu mombelewa youteku woixwa moshikandjohoololo shaKongo nOshikunde Abel Aushona okwa holola kutya oilandomwa aishe ya yandjwa oya kosha ongushu yoshimaliwa shi fike N$20 000.
Aushona okwa ti okuyandja koshiwana omukalondjiikilile mOkongo Community Forest. Okwa fatulula kutya oshimaliwa eshi hava yandje koshiwana ohashi di mokulandifa oihongomwa ile mokulandifa oihape noingumutulu yavo.
“Ohatu lalakanene okulanda oilongifomwa aishe yomombelewa nokutula aishe peenhele. Konima, oixupe ohatu kendabala okuyandja koshiwana,” Aushona ta holola.
Oshikando sha dja ko, ova li va yandja ekwafo koshiwana mwa kwatelwa ovadinwanhu eshi va pewa eexuxwa noikombo.
Aushona okwa ti keshe omunhu okwa li a pewa eexuxwa 30, omiti doyiimati 10 osho yo oikombo 12. “Oikombo neexuxwa oi na olushuno, konima yeedula mbali, keshe omunhu okwa teelelwa a shunife oikombo ivali nodula tai landula ko ta shunifa vali ivali. Ngeenge omunhu okwa tokola okushunifa aishe poshikando, ouwa washo,” Aushona ta holola ngaho.
Kansela woshikandjohoololo shaKongo Efraim Shipindo okwa ti ekwafo eli hali yandjwa akOkongo Community Forest ola kwafa vahapu nokulundulula eenghalamwenyo davo.
“Vahapu ovo va pewa ekwafo eli omwa kwatelwa ovadinwanhu, hano ovayelele. Ova li va pewa oikombo 10 ashike paife ova ninga i li 40. Ovanhu ava ova talwa ko ongovanhu ovo ihava dulu okutekula ashike paife otava lundulula eitavelo eli,” Kansela ta holola ngaho.
Shipindo okwa holola kutya eedalate noikwafifohongo ikwao ya yandjwa kovayelele otai ka kwafa okutula kepya lavo olo va pewa opo va hovele okulonga oipalwifa yavo.
Okongo Community Forest oya etwa po mo1997. Onhele ei oya totwa momufitu wEkuta mu kale eeproyeka dokukwafa oshiwana. -wakudumoauleria@gmail.co