Auleria Wakudumo
ONDANGWA- Oshibofa shomutamanekwa Sinkus Johannes weedula 59, ou vati a dipaa mwene womukunda Onelago oo yoo eli kapatashu womukunda Iikokola Sam Nepando osho yo onghendabala yedipao lamwene womukunda, omukulunhuwiliki wehangano ha li ningi omafaneko eepoloyeka depangelo loNational Planning Commmission I-Ben Nashandi osha undulilwa komafiku 18 Juni 2026.
Johannes, omukalimo womomukunda Iikokola okwa taalela oibofa inhe, oshibofa shedipao, shokuyasha nokukendabala okudipaa, okuya oilonga youyuuki moshipala, oshoyo okulongifa oshifufuta inashi pitikwa. Johannes okwa holoka momhangu yaNdangwa onghela.
Otaku hokololwa Johannes a yasha nokudipaa Nepando oshoyo okukendabala okudipaa eshi a yasha Nashandi Etitano lomafiku 02 Januali 2026. Oshiningwanima eshi osha ningilwa momukunda Iikokola moshitukulwa shaShikoto. Eshi osha holoka konima eshi vati ali ta pulwa oshipambu shedu osho elikufila momukunda omo tuu omo.
Ota ku hokololwa vati omutamanekwa eli kufila edu, a wedela kekove laye shi heli paveta, shoo osho shali sha eta mwene womukunda nakapatashu va pwilikine voo va longe oilonga yavo oyo veli neekelelwa momukunda omanga ina kufa mo ondjebo ndele teva yashe.
Eshi a holoka komesho yomupanguli Nelao Ya Frans onghela, Johannes okwa hoolola opo a kalelwe po kohahende yepangelo moshibofa shaye.
Ohahende yepangelo Yeukai Kangira oya pula omangu opo iha yandje elifutilemo komufekelwa molwaashi vati oshibofa oshakula.
Kangira okwa pula yoo Omangulilo yaNdangwa opo iha yandje elifutilemo molwaashi omuna oonakuningwa oshihakanwa vavali, omo umwe a xulifa naumwe okuli moshipangelo.
Okwa ti epangelo olina oumbangi wa kola moshibofa eshi mwa kwatelwa omafano, noidjemo.
“Ohatu pula yoo opo omufekelwa a ha mone omhito yokulifutilamo shaashi ota dulu okutwikila oilonga yaye nokukadipaa nakuningwa oshihakanwa oo eli moshipangelo. Ota dulu okufaduka po a dje moshilongo Shashi naashi a ninga oshinigwanima eshi okwa hangwa a faduka po, ota dulu okupiyaaneka eembangi shaashi adishe okudishi,” Kangira ta holola ngaho.
Molwa omatomenho a yandjwa kohahende yepangelo, omupanguli okwa undulila oshibofa esho komafiku 18 Juni neudo.
-awakudumo@nepc.com
