Aili Kalola omukalimo wokOngha moshitukulwa shaHangwena, okwa fiwa pomutenya konima eshi eumbo laye a hanga la pepwa po komhepo yoshikungulu. 

Meenghundafana davo na Kundana onghela, Kalola okwa ti oshiningwanima osha holoka Etitano, konima eshi ali eli tuma po, nomo ku aluka kwaye okwa hanga vati eumbo laye li li monghalo iheshi oku talwa, omo ongadjo aishe yeumbo ahanga ya hanaunwa po komhepo, omakuma etekauka noipeleki ei ya li ya dengelwa meumbo oshoyo ei yali kombada yeenduda yalemana, yoo imwe yakupulwa mepya ili monghalo ita i dulu oku longifwa vali. 

“Oikungulu ohandi udu ashike tai popiwa, ndele i na ndishi shakenena nande onale meumbo letu. 

Eshi osho oshikando shotete, eumbo letu tali pepwa po komhepo.,” ta ti. 

Kalola okwa twikila kutya eshi shilulumika osheshi kutya yee oku li meedula dopeendjela, lo neumbo ola idilila ovanhu vahapu. 

“Ame ihandi longo, noka ndina kutya ohandi hange oshimaliwa shoku wapaleka osho yo okutungulula oinima ei ya mona oixuna ngaha,” ta hokolola. 

Okwa twikila kutya nande va kendabala okukukutika oinima imwe pomutenya, onima ihapu oya mona nale oixuna neenghono, omanga ikwao ya tekauka po. 

Omunashipundi woshitukulwa shaHangwena Efraim Shipindo okwa ti ouyelele i na ufika mombelewa yaye, ashike pefimbo ashiivifilwa oshiningwanima ku Kundana okwa ti oko taka pita, yee a tale kutya ofamili ei ya fiwa pomutenya otai dulu oku iyambidida mokukalo woludi li li pipo. 

Omanga Kansela woshikandjohoololo a yelifila ta ti ota ka tuma okangudu kaka ninge omapekapeko opo ovapambele va dule okukwafwa apa epangelo ta li dulu nokuyambididwa. 

taimihaihambo2000@gmail.com