Auleria Wakudumo 

Namibia okwa waimina oilongo yomuAfrica oyo hai talelwa po unene kovatalelipo okudja kondje yoilongo ngaashi South Africa, Kenya, Morocco, Zimbamwe naikwao imwepo. 

Molwa eendjo doshilongo ngaashi eembuwa, oinamwenyo noifitukuti, omifyuululwakalo da yooloka, eendudu, efuta naikwao ya wedwa po, oshilongo ohashi nane vahapu okuuya okutala oushitwe ou. 

Sheli kolelela komutumba womatalelepo muAfrica oo wa shiivika nawa Africa Tourism Board (ATB), Namibia okwa ya pombada momwaalu wovatalelipo neepelesenda 12. 

Odula yad ja ko, omwaalu wovatalelipo moshilongo owa ya pombada okuyeleka nomwaalu wovatalelipo okudja mo2022. 

Omutumba woAfrica Tourism owa holola kutya Namibia paife oteli nanene moilongo yaEurope naNorth America oyo nayo hai talelwapo kovanhu vahapu. 

Eenhele hadi nane omwaalu wovatalelipo vahapu ngaashi Sossusvlei, oshikunino shoinamwenyo Etosha noSkeleton Coast. Nande ongaho, natango vahapu ohava talelepo omifyuululwakalo da yooloka ngaashi Ovahimba. 

Omufyuululwakalo wOvahimba nao ohau eta ovatalelipo vahapu moshilongo, va hala okutala omidjalo davo, onghalo nokushiiva eenghulunghedi davo. 

Omwaalu wovatalelipo muAfrica otau holola kutya okontinente otai dulu okuya ponomola yotete ngeenge tashiya kovatalelipo mounyuni. Eshi otashi holola yoo kutya Africa okuna eendjo, oishitwa nomifyuululwakalo dihapu. 

Omutumba woAfrican Tourism owa tala ko eyo pombada lomwaalu wovatalelipo muAfrica kutya otali dulu okuxumifa okontinente pombada nokuyambula po eenhele domatalelepo muAfrica. 

Omanga ovatalelipo vamwe tava kongo eenhele diwa odo tava dulu okukala, Namibia oha yandje yoo ombili neameno kovatalelipo vavo, osho hashi eta vahapu vaha kale vena oumbada mokuuya moshilongo. 

Odula ya dja ko nande ya enda nawa momwaalu wovatalelipo, natango okwa teelelwa omwaalu uye pombada. 

-awakudumo@nepc.com.na