Kansela mupe moshikandjohoololo shaKankolo moshitukulwa shaShikoto Esala Ndaamekele okwa ti ota ka longela kumwe nouministeli wounamapya, omeva osho yo omatululilo omadu okukandula po onghalo yenota moshikandjohoololo shaye. Okwa ti ota lalakanene moshikandjohoololo shaye mu kale muna eembola domeva di li nanho. “Onda didilika moshikandjohoololo shange mu na omikunda ta di dengwa kenota molwashi eembola domeva ina di wana,” ta ti. 

Ndaamekele weda po ta ti moshikandjohoololo shaye omu eembola dimwe di na omeva alula osho shi li eshongo linene. “Ovanhu ohava ende eendjila diledile tava ka teka omeva komikunda dokokule,” ta ti. 

Okwa ti ota ka longela kunwe nopolifi noovene vomikunda okukondjifa omahepeko omomaumbo. 

Kansela okwa yelifa ta ti moule weedula odo a pewa oshinakuwanifa shokulela oshiwana ota ka eta po omalunduluko mawa a yooloka ngaashi eepoloyeka dovanyasha. 

“Moshikandjohoololo shetu omu na ovanyasha ve na ounongo osho yo ohokwe yokutameka oikunino yavo younamapya,” ta ti. 

Ndaamekele okwa weda po ta ti omhumbwe yomeva oi li eshongo linene la taalelwa kovanyasha shaashi itava dulu okutameka oikunino yavo. 

Kansela okwa popya natango ta ti ota ka kwashipaleka kutya moshikandjohoololo shaye ota mu kala ovanhu va pewa omaufemba woshilongo. 

“Onda didilika tu na oupyakadi wovanafikola hava pewa omateel elo kovakwashiwana Ovaangola ashike oha shi kala shi djuu ounona va mone oufemba. 

Natango, kansela okwa pula ovadali opo va kwatafane nombelewa yaye una ngeenge va didilika pena maupyakadi komikunda davo. 

“Natu longeleni kumwe opo tu dule okuyambula po moshikandjohoololo shetu. Naame onda pumbwa omayelele eni,” ta ti. 

fhamalwa@nepc.com.na