Ovanamiba vahapu ova ninga omafiku ve li meteelelo konima eshi va uda kutya olweendo lomuAmerica omumwenyeki dingi Darren Watkins Jr oo a shivika nawa onga IShowSpeed, ola kalekwa pokafimbo, molwaashi eembapila daye dokupita peengaba ina di potokonoka nawa.
Watkins omunamido 20, oku li oshiima shakula mokapale kokumwenyeka ovanhu komalungula, novanhu vahapu unene ovanyasha ohava kala va tala kuye onga omukumo efiku nefiku.
Okwa yelifa oshiwana kutya, eshi ina dula okukala a fika moNamibia omolwa eembapila daye dee pelemita, odo da li ina di patukunuka nawa, oshoyo odila yopaumwene oyo a li ta longifa, okutalelapo oilongo nayo oina mosha moshikumungu eshi she mu imba a fike moNamibia pefimbo.
“Ita ndi kalongifa vali odila yopaumwene, ndele oha ndi ka longifa ashike eedila edi hadi longifwa ko vakwashiwana, okuenda noilongo,” ta ti.
Vistorina Shiwana oo eli omushikuli a kula wa Watkins, okwa ti okwa ongela nale olefa yaye, a ka shakeneke ekoma li kwao mokumwenyeka oshiwana kopale fiku ta li fiki. Vamwe ova yandja omaulido kepandja loFacebook ova yelifa kutya, ova hala a fike yee euye a tale nokufaneka eedjo da kula moNamibia.
“Oinima ngaashi oshikunino shoinamwenyo, omafuta, efuta lomeva omongwa, oshilandopangelo ashishe koonono omo mwa kwatelwa eenhele edi dina eendjokonona dekondjelo manguluko doshilongo,” ta va ti.
Omanga vamwe ta ti, fye okwa li ashike twa hala euye a ka tale okapana ko single quarters yee taka enda moKatutura a tale nghee Ovanamibia va nyakwa mokudengela omalukalwa avo.
Umwe womo vamwenyeki moNamibia natango Mulongo Hiipinge okwa ti, ei ota i kakala omhito iwa shaashi Watkins oku li etwo mukumo kovanhu vahapu.
“Okumu mona koshipa, no ku popya naye oshili ota shi ka kala ondjodi ya vahapu,” ta ti.
Ashike nande ongaho vati moNamibia okuna ngaho okuuyamo, nande ha pefimbo eli kwa li a teelelwa, nOvanamibia ove li longekida oku mu tambulako.
Watkins okwe li pyadikila nolweendo la kula lo ku enda oilongo ya fika po 28 muAfrica. Fiyo opapa vati okwa dula okutalela po oilongo ngaashi Angola, South Africa, Botswana na Zimbabwe.
taimihaihambo2000@gmail.com
