ONGWEDIVA – Omushikingalo Niinyandu Sebron ashivika nawa Mbuku okwa hokolola ta ti ovashikingalo vamwe paife ihava pewa vali eemhito dokuhafifa oshiwana koivilo ya kula shaashi ovawiliki ohava longifa oulingilingi. 

“Paife ita tu xumu vali komesho ile tu mone oshimaliwa shaashi efimbo keshe ovashikingalo ashike vamwe hava ku fwa po va ka shike eengalo,” ta ti. 

Okwa ti efimbo keshe ta ningi omaindilo iha di mo tuu nande shaashi ovanhu otava longifa oungilingi okukufa ovanhu vamwe kohandimwe. 

Meenghundafana va ninga naKundana onghela Mbuku okwa ti keu dite ombili shaashi paife ovanhu ovo tava wiliki oivilo ngaashi omaulikilo oipindi ohava longifa oungilingi. 

“Keshe kodula ovanhu ashike vamwe ovo tava mono omhito yokufutwa ngeenge va shika eengalo. Ovanhu nava kale tava longo pauyuuki no moshili,” ta ti. 

Mbuku okwa ti moNamibia omu na ovanyasha vahapu ve na ounongo vokushika eengalo ashike ova teka omukumo shaashi ngeenge tava ningi omaindilo okukashika eengalo koumalikilo oipindi iha pewa omhito. 

Okwa pula ouninisteli wehongo, eenghulunghedi, ovanyasha nomaudano opo u kale tau ningi omapekapeko ngeenge ovashikingalo va ninga omaindilo okukashika eengalo nelalakano lokutala ngeenge otava longifa ouyuuki. 

Mbuku okwa ti okwa tameka okushika eengalo omudo 2014 molwashi okuhole okulongifa oshitalendi shaye. 

“No nande nda taalela omashongo ita ndi sholola okulongifa ounongo wange okushika eengalo shaashi ondi hole okuhafifa oshiwana,” ta ti. 

Okwa ti ovanhu ove hole okupwilikina eengalo daye molwashi ohandi kala di na omatumwaaka taa tungu. 

Mbuku okwa hokolola ta ti komesho yomafiku ota ka pitifa ongalo tai ti“Ombakiteli” sha hala kutya okwa loloka oilonga ii noulingilingi tau longwa moshilongo. 

Okwa fatulula moule ta ti Ombakiteli otashi ti oshinima shii molwashi oha shi dulu okuteya po onghalamwenyo yomunhu. 

Mbuku okwa ti omwedi Desemba ovashikingalo ohava mono omhito yokulonga oshimaliwa keehango ashike ova taalela eshongo linene lodula. 

“Desemba kau shi omwedi muwa  wokuufana ovashikingalo va kashike eengalo keehango shaashi oha kula kuna odula,” ta ti. 

Okwa ti ohava kala va pandula shaashi ova mono oshimaliwa shokuyambidida ounona vavo ngeenge tava ka tameka ofikola ashike ka shipu ngeenge ku na odula efiku olo. “Oto hange ovafuko vamwe ngeenge ku na odula ndele omushikingalo ta kala i na ka shika eengalo molwodula nomhepo, iha futwa vali,” ta ti. 

Okwa yelifa ta ti ovashikingalo ohava taalela omashongo a yooloka osho ha shi va teya omukumo. 

“Diladila eike omunhu wa dja kokule ndele eshi va fika kohango odula oya tameka okuloka. Okudja opo ovafuko i na va hala okufuta. Ka shi li mondjila,” ta ti. 

Okwa lombwela oshiwana opo shi fimaneke ovashikingalo vo meni loshilongo ngaashi naana va fimaneka ovashikingalo hava di kondje yoshilongo. 

fhamalwa@nepc.com.na