Omunambelewa ta longele koshitukulwa shaMusati mouministeli womidingonoko, eefuka novapashioni, Loveness Ndeiweda okwa kumaida oshiwana opo shi kale kokule neendjaba osho yo okuxulifa po okuenda oufiku shaashi osha nyika oshiponga. 

Ndeiweda okwa li ta popi kombinga yoshikumungu sheendjaba da lopotwa te li te yela oshikandjohoololo shaTamanzi moshitukulwa shaMusati onghela. 

Okwa yelifa ta ti ombelewa yavo oya tuma ko ongudu yovanhu hava longele kouministeli womidingonoko opo va ka popye novanahambo nghene ve na okuliumbata. Okwa yelifa ta ti fiyo opapa ina pa lopotwa omunhu a dipawa ile a monifwa oshiponga kondjaba. 

“Eendjaba oda dilila koshikunino shoinamwenyo kEtosha. Ota di ende neehambo da yooloka komudingonoko Amarika,” ta ti. Okwa ti komudingonoko waAmarika oha ku lopotwa shito ku na eendjaba molwashi onhele oyo oi li popepi nEtosha. 

Okwa yelifa ta ti itashi kutya ngeenge eendjaba tadi ende momikunda onde ya okudipaa ovanhu ashike ota di kongongo ouxupilo. 

“Ashike ngeenge omunhu okwa kendabala okudenga ondjaba otashi eta i kale ya nyemata ndele tai ponokele ovanhu osho shi li sha nyika oshiponga,” ta ti. Ndeiweda okwa ti ombelewa yavo oye li longekida efimbo keshe okukala ya fika konhele oko kwa lopotwa ku na eendjaba. “Ohatu lalakanene okuxupifa eemwenyo dovanhu osho yo oiponga. Natu longeleni kumwe noku fimaneka omilandu da tulwa po kepangelo,” ta ti. Kansela woshikandjohoololo shaTamazi Irja Mbutu kwa ti ovakulupe novanafikola ngeenge tava di kofikola ove na omhito yokuponokelwa keendjaba. Kansela okwa kumaida oshiwana opo shi lopotele ombelewa yaye ile ovanambelewa hava longo kouministeli womidingonoko ngeenge sha mono eendjaba. Okwa pandula eshi ouministeli womidingonoko wa endelela okutuma ongudu yovanambelewa okukandula po omukundu weendjaba. fhmalwa@nepc.com.na