Auleria Wakudumo
Minista womauyelele nomakwatafano opaungoba Emma Theofelus okwa talela po oshikunino shakula shoikunomwa, oihape noingumutulu Etunda koshitukulwa shaMusati Etitatu.
Minista okwa holola kutya okwa talela po Etunda molwaashi ohadi popepi noshikunino.
Okwa ti okwa tokola opo a talele po Etunda opo veli like komulungu nomukulunhu woshikunino okuuda omashongo nokutala nghene taveshi endifa.
Okwa ti oshikunino osha ya momalunduluko a yooloka oule weedula edi. Onghene osha fimana okutala eeproyeka dipe odo da tulwa moilonga ngaashi ekuno lomabanana mEtunda.
“Onda hala yoo okuuda ekwatafano pokati keeproyeka edi depangelo novakwashiwana vopomudingonoko,” Theofelus ta holola ngaho. Oproyeka yepangelo mEtunda oahi kunu oikunonwa ya yooloka ngaashi omamengo, omandjebele, omalemuna, oihape noingumutulu naikwao ihapu hapu. Oproyeka oya enda okuwedela oikunonwa ngaashi omabanana.
Minista okwa holola kutya ovanhu ve dule po450 ohava kutwa okulonga mEtunda keshe kodula.
“Eshi otashi tu ovanhu omukumo notashi holola kutya oveli mondjila iwa. Shoo osho tashi tu kufa momutumba nena opo tu fike apa tu tale oilonga iwa tai longwa notuude omakemo moshiwana,” Minista ta holola.
Theofelus okwa ti okuuda omaudjuu osha fimana opo eeministeli di dule okulongela kumwe nokutala nghene tava kandula po omaupyakadi oo amwe haa pula elongelokumwe lavo aveshe. Okwa yandja oshihopaenenwa shelongelo kumwe pokati kouministeli womauyelele nouministeli wounamapya nounaimuna. Omukulunhuwiliki woproyeka yEtunda Irrigation Sacky Shilyomunhu okwa shiivifila minister omashongo o ova taalela moshikunino ngaashi ehanauno noulunga wa duva wovakwashiwana tava hanauna nokuvaka po omaliko oshikunino.
Minista okwa takela omunhe aveshe ovo tava hanauna po omaliko epangelo. Okwa ti oshikunino osha tulwa po okukwafela oshiwana ndele ina teelela oshiwana osho shi kale tashi hanauna po ekwafo olo la tulwa po kepangelo.
Okwa dimbulukifa aveshe kutya ounamapya oo kamana kandongo paife. Okwa ti ondjala noluhepo otali dulu ashike okukandulwa po ngeenge otwa longo noudiinini mounamapya.
-awakudumo@nepc.com.na
