Lahja Nashuuta

Aakwashigwana yaNaanda oya ipyakidhila nomalongekidho okuunganeka ekanka lyopambili, nethaneko lyi kale ko oshiwike shika opo ya gandje omanyenyeto gawo nge  tashi ya petambulo lyuunona mosikola nosho wo omuhandjo gosekundosikola yaNegumbo.

Aakwashigwana oye wete kutya osekundosikola inayi hala okutambula uunona uuvalelwa womOnaanda, momuhandjo opo ya gandje ehala kuunona mboka wa za komikunda dhokokule. 

Omundohotola Sioni Ikela, ngono a popi peha lyaakwashigwana okwa tseyitha kutya oshigwana shaNaanda oshi li shi uvite nayi molwetseyitho okuzilila komukuluntusikola kutya aanona ayehe mbono ye li mOnaanda nUutsima itaya ka tambulilwa momuhandjo.

“Pamawuyelele okuzilila komukuluntusikola gwaNegumbo Secondary School Kristof Aipanda , omuhandjo ogu udha naanona ayehe haya ende oshinano shi li kohi yookilometa ntano itaya ka tambulilwa momomuhandja,” Sioni ta yelitha ngaaka.

“Ondondo ontihetatu nosho wo ontimugoyi nadhi ze mo moNegumbo – nomoosekondele, ngaashi uuministeli wa li we dhi kutha mo nale, dho odho unene dha etitha omukundu nguka pu kale kapu na omahala momuhandjo,” omukwashigwana gumwe ta gwedha po ngaaka.

Ta gandja wo omakemo kaakwashigwana kutya aanona oyendji ohaya ende iinano iilekaleka, noya pumbwa okukala momuhandjo. 

“Shika osha pumbwa okutalululwa unene molwiinano mbyoka aanasikola ye na okweenda   kehe esiku ongula nokomatango, okuza ngaashi kOmapopo, Etope, Okadhiya Koshumba nenge kOkathitu  okokule nayi,” Ikela ta tumbula ngaaka.

Sho osho hashi ka eta omandopo kaanasikola motshitopolwa shetu. Elelosikola nali tale po nawa.

 Omushangwa okuzililia mombelewa yomukuluntusikola Kristof Aipanda okwa li wo gwa tseyitha kutya kehe okanona ke li momusholondondo gwaamboka ya tambulwa okuza ponomola yotango sigo 38, naka kale ka etelela etalashe lyokulala.

Aipanda ta tseyitha wo kutya osikola ye oya li ya pewa uunona wa gwedwa po 112 okuzilila kombelewa yelongo yoshikandjo, nuunona mboka owa li wa pitilila pwaamboka ye na okutambula.  Omukuluntusikola ta tseyitha wo kutya ngashingeyi osikola oyina aalongwa yondondo onti 10 ye li 255.

Ta gandja wo uusama kombelewa yelongo moshikandjo molwetokolo ndika.

 Aipanda ta ti nonando osikola ya tseyithile oshikandjo kutya kayi na oombete noongulu dha gwana okulongela aanona , ota ti oshikandjo osha li sha gwedhele osikola naanonona mbono ya uka mondondo onti-10 naanoona ye thike pethele nasha, no ku tsa omudhindo kutya yamwe ota ya ka longelwa  mootenda, omanga ongulu tandhi tungwa..

Ta ti no nando osikola oya li ya shangele ko ombapila koshikandjo, kemanya oge kuza wo ontsi. Ta ti aanona oyehe yaNaanda nUutsima ita ya ka tambulwa momuhandjo posikola ndjoka. 

-lnashuuta@nepc.com.na