ONDANGWA- Ofamili yaSalom Nicanor (41) ou vati a dipawa ndele ta tetwa oilyo youlumenhu waye kukaume kaye otai pula moshiwana opo shi va yambidide nomakwafo opashimaliwa okuninga efudiko.
Ofamili onghela ya popya kutya ova kwapata vomulumenhu au vati a dipaa Nicanor ova ya keumbo lavo okukapopifa ashike fiyo opapa ina va pewa ekwafo loshimaliwa.
Ova hokolola kutya noshimaliwa osho tashi tongwa kutya Nicanor okwa li a shingifa momahangano omafudiko komutamanekwa ina ve shi pewa.
“Ka tushi shi kutya oimaliwa inga pi a shangifa mehangano,” umwe ta ti.
Umwe womukwapata Jacobina Adenel okwa yelifa ta ti ovataalela eshongo loshimaliwa okulongifa peefya shaashi nakufya ka kwa li e na oyuuyemo ya sha.
“Pamwe ofamili yomufekelwa opo ngaa tai ya okuyambidida. Okudja efiku eefya daa tameka ina tu mona omakwafo,” ta ti.
Oshivike sha dja ko famili okwa li ya ngudumana komhangu yaMangestalata mOndangwa tai ti omutamanekwa ina pewa obooloha.
Omutamanekwa weedula 25 Andreas Sunday Kanyanga okwa nyenwa omhito yokulifutilamo modolongo pefimbo a holoka momhangu yaNdangwa oshivike sha dja ko.
Oshibofa shaye sha undulilwa komafiku 18 Juni 2026 opo ku ningwe omakonakono omoule.
Opolifi oya hokolola tai ti omufekelwa ou vati konima eshi a teta ko oulumenhu wa mukwao okwa ya nayo keumbo lavo ndele teu xwike po nokonim okwe u fudika meumbo lambulavo.
Olutu laye ole li tuwa li li metale lomeva onyata, Osoondaxa shomafiku 3 neudo, efimbo longula modoolopa yaNdangwa komukwashiwana kwa li ta ende ponhele opo.
Omukulunhu koshikondo shokukonakona oimbuluma wopolifi moshitukulwa shaShana omupedu komufala Fredrik Ndjadila okwa koleka oshiningwanima eshi shinyanyalifa.
Opolifi oya hokolola tai ti Nicanor ou okwa hangika a kupulwa metale lomeva ashike okwa tetwa eefukwa odo di li koilyo yaye youlumenhu.
Opolifi oya kala nokuninga omapekapeko osho yo okupula moshiwana kwau e na ouyelele kombinga yoshiningwanima eshi.
Omufekelwa ou okwa kwatwa po Omaandaxa efimbo lokomatango mOndangwa konima eshi oshiwana sha yandja ouyelele kopolifi.
Opolifi oya koleka tai ti omufekelwa ohava di pomukunda umwe nanakufya, vo ookaume.
Otaku hokololwa kutya omufekelwa vati okwa sha ngifa nanakufya ou e li kaume mehangano olo ha li shangifa ovanhu okupewa oshimaliwa shokulongifa peenghali ngeenge omunhu a xulifa.
Opolifi oya hokolola tai ti konima eshi omufekelwa a ningilwa omapulapulo okwa popya kutya okwa dipaa kaume kaye shaashi okwa hala oshimaliwa osho ha shi yandjwa kehangano olo.
Vati omufekelwa okwa lombwela opolifi kutya oilyo youlumenhu yakaume kaye okwe fudika meumbo lavo ndele nokuixwika po.
Umwe womukwapata wanakufya okwa lombwela Kundana ta ti okwa kumwifwa koshiningwanima eshi molwashi omufekelwa okwa li ve na oukaume muwa nanakufya.
“Okwa li alushe hava ende ve li lamba vau ka keendingosho. Ohatu a nye okuitavela kutya omufekelwa oye a longla kaume kaye omunyonena ou shaashi okwa li ve na ekwatafano liwa,” ta ti.
Okwa ti omufekelwa oku na okukala a landela nanakufya omalodu efiku olo shaashi okuhole oku mu landela omakende malula.
Oshiningwanima eshi shomulumenhu a tetwa eefukwa osha tilifa oshiwana omo shina oumbada kutya mboli monooli omu na omidamba tadi longele ovanhu ominyonena.
-fhamalwa@nepc.com.na
