Oshiputudilo shopombada shoUniversity of Namibia (Unam) osha yelifa kutya itashi ka tambula ovanafikola tava dilile kondodo onhi-11.

Omupopiliko woshiputudilo Simon Namesho okwa ti omunafikola opo a dule okutambulwa moshiputilo shavo, na kale e na oidjemo aishe yondodo onhi-11 no12.

“Eshi kashi na nee kutya omunhu okwa hala okulihongela odjapo yodiploma ile odegree. Shimha ashike a fya oshisho kutya oku na oidjemo yondodo onhi-11 no12 poshitaafula,” ta ti.

Mhanga tu li pomulandu wetambulo loidjemo yaUnam, ehangano olo li na oshinakuwanifwa shokufutila ovanafikola koiputudilo yopombada NASFAF, nalo ola yelifa yoo kutya it li ka futila ovanafikola ovo inava pondola okumona oitwa ya koya po 26 moilongwa itano okudja mondodo onhi-11.

Keshe omulongwa opo a dule okukala a yambididwa ku-NASFAF, na kale a mona oitwa yakoya po26, nongeenge okwa kala ine i mona, okwa teelelika e ke lifutile ye mwene.

Oiputudilo oyo ya manguluka okutambula ovanafikola ve na ondodo onhi-11 oyo aike ongaashi NUST, IUM, NIMT nee-VTC.

-taimihaihambo2000@gmail.com