Auleria Wakudumo 

Ovashikingalo vahapu ova holola kutya oNamas oya li ya fa oUnam kuvo, oyo hava kala va teelela kodula opo va pewe omapapa omushikingalo dingi meengalo da yooloka ngaashi ashike omuhongwa a teelela okudjalekwa enguwo molwelitulemo moihongwa yaye. 

Vahapu ova holola olupandu komalungula kouministeli wehongo, oungoba, omaudano novanyasha eshi wa holola kutya owa tula poshitaafula eemiliona N$10 okwaalula oNamas. 

Omushikingalo Leo Nghilifilwa nedina la shiivika nawa ‘KangweSon’ okwa ti okwa pandula epangelo eshi la ninga etokolo eli opo li kufe koshi ovashikingalo moshilongo. 

KangweSon okwa holola kutya odula a tameka okwiimba, oyo ngaho odula oyo oNamas ya xula. 

“Omanga inadi hovela okwiimba, onda li alushe handi tuwa omukumo kwaavo tava findana koNamas nokwa li ndi na etimaumbwile kutya ohandi ka kala yo naame efiku limwe handi imbi koNamas,” KangweSon ta holola ngaho. 

KangweSon okwa ti okualuka kwoNamas otaku ka twa ovashikingalo vahapu omukumo. Okwa weda po ta ti vahapu paife ova fya ounye shaashi kape na eshi tashi va tu omukumo. 

“Onde linekela oNamas itai ka xula po vali opo i dule okutwa omukumo ovashikingalo vakulu naava tave ya mowela omukumo okukala ve litula mo,” ta ti ngaho. 

Ouminsteli wehongo owa koleka kutya owa tula poshitaafula eemiliona N$10 okupatulula vali oNamas neudo. 

-awakudumo@nepc.com.na