Omushikingalo a shivikila nawa okumwenyeka oshiwana moSouth Africa omumamido o19, Naledi Aphiwe okwa ti neudo ota ka sitela ko keengalo daye. 

Aphiwe okwa ti oalubuma yaye yedina Debut, okwa hala yakula, noneudo okwa tokola e lipake mo yo meifano nomolweendo laye lokushika eengalo shaashi okwa hala okukulika eifano laye, ye a nghonopaleke olweendonghalamwenyo laye moshikondo shokushika eengalo. 

“Odula ei onde i tameka mondjila iwa, eshi nda li nda tulwa moshihoololifo moSouth Africa ongomushikingalo dingi, mokushika eengalo mumwe, hano ongalo ohatu i shiki tu li vavali. Nonande inndi mona omhito yokufindana epapa ngaashi vakwetu, onda pandula eshi nda li nda mona omhito ndi ka kalele po oshilongo koLagos, oko twa li twa ya naMerwelela, mbushe moilonga,” ta ti. 

Okwa twikila kutya neudo okwa hala okukala ta ende oilongo ta imbi, opo a dule okukulika oshitalendi shaye, ye a shivike mounyuni, unene ngeenge tashi ya pokunyakula ovanhu. 

Aphiwe koLagos okwa li a hoololwa pamwe noombushe moilonga, ovo ve li oinima yakula mowela ngaashi Kunmie wokoNigeria, Manal vokoMorocco, osho yoRema. 

“Po opo opo nee nda dja nda mona kutya ame nghi shi ngahenya mboli. Ovanhu ava nda hoololwa navo tu ye koLagos, ove li oinima yakula mokapale, nosha ulikila nge kutya ngeenge onda twikile okukala handi longo noudiiinini ondi na okuya kokule mboli,” ta ti. 

Aphiwe okwa li a mona omhito yokutalela po Namibia koWindhoek odula ya dja ko, ndele ka li a fiya emanya la londa kulikwao. 

Okwa li a nana ovanhu keedoolopa da yooloka ve ya okutala nghee ta undula ongovela kembako, ye ta shamubla aveshe ava va li ve ya okutala. 

Keshe Omunamibia a li ko, okwa dile ko e na ehokololo la yooloka tali tange Aphiwe kutya kemupu. 

-taimihaihambo2000@gmail.com