Auleria Wakudumo
Opolifi oya londwela ovahongi, ovadali novatekuli vounona opo va file ounona oshisho pefimbo eli va hovela ofikola.
Opolifi oya indila ovahongi novadali vounona va takamife ovahongwa unene momidingonoko dofikola eshi ovahongwa vahapu tava kongo natango eefikola, efimbo eli olo yoo efimbo va dididlika oikengelela ihapu hai ningwa okukengelela ovadali ngeenge tashi ya keenhele dovahongwa mofikola nomomihandjo.
Omupopiliko wopolifi, Deputy Commissioner Kauna Shikwambi okwa holola kutya nonande efimbo eli ohali kala li shambula kuvahapu, eli olo yoo efimbo ovahongwa vanini unene mondodo yoshikunino nondodo yotete tava hovele ofikola lwotete.
“Ava ohava kala vehe shi eendjila dokuya kofikola nawa nomudingonoko wofikola woovene. Ovahongi, ovadali novatekuli vounona otava indilwa opo va longe ounona va kale alushe ponhele imwe ngeenge tava twalwa ile tava di kofikola,” Shikwambi ta holola ngaho.
Opolifi oya kumaida ovatonateli vounona va kwashilipaleke kutya itava ende mopate, ounona tava teelele okufindikilwa kofikola fiyo tava kala va manguluka nokushiiva okuya kofikola voovene.
Ovadali otava indilwa opo va kundafane nounona vavo eemhangela dokuva pitula kofikola alushe opo va kale veshii kutya olyelye teva ile kofikola efiku olo. Nava longe ounona okweenda moungudu okuya nokudja kofikola. Ovadali otava indilwa yoo va longe ounona vavo op ova kale veshii omadina avo eli xwapo.
Eefikola oda indilwa opo di kale hadi longifa omadidiliko omeendjila pomataulukilo eendjila dovahongwa odo dili popepi nofikola omo ovahongwa tava ningi omalufo okupitifa vakwao.
Opolifi oya kumaida yoo ovalihongi unene ovo va uka koiputudilo yopombada oshikando shotete opo va kale oupafi ngeenge tashiya kokukonga omalukalwa avo oshoyo okufuta ofikola.
Opolifi oya didilika kutya vahapu ohava ningi oihakanwa yookalyamupombo ovo haveli ningi vafa ovasamaria ovanamutimanghenda opo ve va kwafele okukonga omalukalwa. Vahapu ohava keli hanga tava kwena eshi va kufwa oimaliwa nomaudaneko oo vali va ningilwa inaa wanifwa po.
-awakudumo@nepc.com.na