Rudolf Gaiseb
Erongob ǀKharisi ǀAwemā!nans aiǂnû-aob, Lazarus Kanelombeb ge ge mî, ǁgam-i !nubusib ǁgoaǂuis hîa Atsâs tsî ǁîs ǂnamipe ǁgoe !âga ra tsâǀkhāb, ǁîb di dīxūn ǂgaekhâib ai ǂgurose mâi hâ !khaisa.
ǀAsase ge !gaeǂgāhe aiǂnû-ao tsî ǁkhāti ǂGaribeb di ǁhûi!nâǂharis di ǂgiǂgosi ǀawemā-aob, Kanelombeb ge New Eraba ge mîba, ǁîb NamWaters ǀkha sîsenǁareb !nâ hâsa, nē mâsiba hâhâ nî oresa hōbas ase. ǁÎb ge mîs ge nēb ra ôa pres ǁkhāti ǀkharib !nâ hâ nau !âgu hîa ǁkhā !gomsib ǀkha ǂnôagu tsîna !khōǂgā !khaisa. ǀHûhâsib ge nē !gomsiba oe-ams ase ǁîn di ǁhōde xu tenkga ǁgam-e ǀoaǀoabahes !aroma ra mātaresa.
ǂOa ge kurib di kaitsēdi ǁaeb !nâb ge NamWaters mîgowaba-aob, Lot Ndamanomhataba ge ǂanǂan hâ i, N$15.20 ǀgui kubike meter-i ǂganǀgaub ain tenksa a ǀoaǀoabahe ǁkhā !khaisa. NamWaters ge ǁanǂgāsabena ge mîba, ǁgam-e sī-ūs ǁgaumâisa ǀhûhâsib ǁgam-i tenkdi !aroma gui nî hâ tsî ǀguiǀguibe omaride !khōǂgā tama hâsa. ǀNî !gomsib hîa ge aoǁguiheb ge, nē ǁgam-i ǂhabase sîsenūs !aroma ǂâu tama hâsa, ǀnî ǁanǂgāsaben !hanaga ǂnâ tsî ûitsamaxūn tsîna nî āsise ī xui-ao.
Nē mātare tama is !nâ !gomma ra tsâ tsî ǁgam-i ose ra hân ge kairakhoen hîa ǂauna ǁnurisan, ǀaokhoen tsî sîseno ǂkhamkhoen ǀkha hâna, ǁîn hoaǁae ǁkhāsib mātares dib !nâ hâ tama xui-ao. Atsâs ǂGari-aon !Nans di ǂgaeǂgui-aob, Rudolf Kahingungab ge ge mî, ǀhûhâsigu kaise gaxu kuriga ǁgam-i !nubusib !gomsib ǀkha !goaxasa, !kharu ge ǁkhâgu hoan xa îbe ge !gom i hîa.
“Sida ge ǁkhā da an hoana nē !gomsiba oresa hōbas !aroma ǁguisa daoga saos !nâ-ū ge dītsâ. ǂAuna sîǂkhanidi, ǂgaekhâisa ǁgauǁgaun ǀkha !nurigu, ǂgandi tsî !hoaǁaredi ge ǀnîn dītsâ da hâna, xawe ǀguis khami ī !gâi!gâ-i ose,” tib ge ge mî. Nēs xa !aromahe hâseb ge mâsiba nēs kōse ge ǁgaia!nâ, Kahingungab ra mîsa !oa. “Sida ge ǁnâugu tama i-e ôa tama hâ, xawe da ge !aruǀî a !nō oa, sida khoesi ǂhanub !gao!gao ǂhâsib ra ǁnā!gâhe hîa,” tib ge ge mî. Atsâs di senior danakhoeb, Jonathan Neumbob ge aoǁguiba ge dī, NamWaters nî tsaugu hîa Tsoaxaub !āb ǀnomammi ai ǁgoega ǁkhawa sîsenxas mâsib !nâ oahā-ū tsî ǁnās !nâ-ū ǁgoehâ paigu !nâ ǁgam-e ǀgaiǀgaisa. Nē tsaugu ge !kharu ge aegu !nâ NamWaters xa ǁnā !aromas !aroma gere sîsenūhe.
