Daogu Kurus ǂNûiǂgās (RCC) ge nēsisa xu aitsama nî kōsen, hoaǁae ǂhanub xa marisi !gomsiga xu nî huiǂuihese is ose, !nari!oabadi ministeri, Veikko Nekundib ra mîsa !oa. 

Ministeri ge kaise !gāsase ge mî, ǂhanub xa a ǀhonkhoe-aihe ǂnûiǂgās nēs nî aitsama ǁawosase ǀgaisa !oa unusen tamas ka i os tsūba aitsama a !aromabasen ǁkhā !khaisa. 

ǁNāpab ge ǂoa ge wekheb di Donertaxtsēs ai senior ǂgaeǂguis ǁanina gere gowaǀî soab !nâb ge Nekundiba gere ǂan ǂgao, tare-i !aromas RCCsa hoaǁae ǂhanub ai marisises kara ǂkhawu ǁaeb ai nî !gâbasen !khaisa, ǁîs !nāsa tenderde nau hâ !hūb !nâ ǂharugun hoana ǁgoeǂam hâse ra !khō!oa hîa. Ministeri ge ǁgarisa ǀkharaǀkharasiba gere ǂgaoǂhere. “Sadu ǂnûiǂgās ge horahus di ǂnûiǂgā Namibiab !nâ !nāsa tenderde ūhâsa. 

!Nona !nādi tamas ka i o 10 !nāde aitsama mâbasen ǂnûiǂgādi !hū hâdi xa a !nāsasa,” tib ge Nekundiba ge mî. Ministeri ge mîsa !oadi ge !nāsa aitsama mâbasen ǂnûiǂgāde ǀgui tendersa xu kurib ǀgaiba ra kō!gâsen, RCCs ǂaunadi, ǀnî ǁaega 20 tenderdi ǀkha !khai-i ai sī tama hîa. ǁÎb ge ǂgaeǂguisa a mîbas ge, ǂhanub xa !aruǀî nî huiǂuihese is ǀams kōse go hā !khaisa, ǁnāpa i !aroma-e a ǀkhai nētikō tenderdi khao!gâ du noxopa ǂhanuba xu marisihuiba nî !khō!oabas di-e amaga. “ǀGui tamas ka i o ǀgam ǁkhâkha !nâ ta ge sado ǀguri koro tendered ge mā. Xū-i ge !khai-i ai ǂhanu tama hâ nē ǂnûiǂgās sistems !nâ tamas ka i o sîsenaodu !nâ,” tib ge ge mî. ǀGaisa !khâikhomsab ge ǂnûiǂgās ǀawemā!nans tsî ǂgaeǂguisa ge mā. 

“Sadu nî ǁgariǁgarisasiba mûǂgā tsî sîsenǂuib ǀkha ǁgaus tamas ka i o du sado ǁgariǁgarisa ssenǂuib xa nî saohes. 

!Ereams ge sadu !omgu !nâ ǁgoe,” tib ge ǀgaisase ge !khâikhom ni. Ministeri ǂkhîo!nâsib ai oe-am tsîb ge Dana Sîsenǂuira Mâisab, Dasius Nelumbuba ge mî, ǀnais nē ǂnûiǂgāsa !gāsase a ǁguiǂuisa sîsenǂuiǀgauba ge ǂgaekhâi tsîs ǁnās !naka ministeri ge ǁguiǂui ǁgoaǂuide nî oe-am !khaisa. ǁÎb ge !kharu ge kurigu !nâ ge hâ i ǁgoaǂuidi, !gōsase kuru-ūxūn diba ge ǂan!gâ tsî xawe ge mî, ǁnā !gomsigu ge oresa a hōbahe !khaisa. ǂHâbasa masindi tsînan ge ge ǁama tsî projekdi hâpa nî sîǂuihe. 

Texnise ǀkhab ain ge ūhâ i !nubusin tsînan ge ge oe-am. “Texnise !âb !nâ ǂgaoǀkhāsa ǂans tsî ǁkhāsiga ūhâ khoe-i !nubusib !aroma da ge sîsensoasa ǂhaitsise ge ǂganamsendi !aroma ge māǂui hâ i, tsî da ge ǁnā soas tsîna ge ǀoaǀoa tsî nēsi ǂansabe-e sida ǁaegu ūhâ,” tib ge Nelumbuba ge mî. ǁÎb ra mîsa !oan ge nēsi sîsenǀgauba ǀoasase !amǂgās, marisa kurus tsî aitsama mâbasens ǀguisa ra ǁawoǁawo.