OSHAKATI – Aalongi, uuministeli wuuthemba womuntu osho wo opolisi moshitopolwa shaShana, oya kumagidha oshigwana shi hulithe po okulongitha nokufuta aanona yosikola komatala gaShakati, oshoka onkalo ndjoka ohayi ya fawulitha oosikola.

Omatala gaShakati ohaga kala nomasiku gi ikalekelwa Omaandaha nEtitano, ngoka haga hili ookasitoma omolwofanditha hayi kala ko, onkene aanona yosikola unene momasiku moka ohaya hilwa koshimaliwa shoka haya pewa ngele ya undula uutololi wookasitoma.

Aanona mboka ohaya futwa oshimaliwa okuza N$5 sigo N$10, naashika ohashi ya shololitha koosikola.

Kuuyelele wa gongelwa kaalongi mOshakati, aalongwa mboka ohaya hiti koosikola Ehenye, Okatana, Mwadhina gwaNembenge osho wo omikunda dhopopepi.

Omulongi goLife Skills Dolly Frans, posikola yimwe mOshakati okwa ti, onkalo ndjika oya zi nale, ihe otayi ende yu uka kuuwinayi oshoka aanona otaya ende taya hekathana nokukutathana.  

“Uupyakadhi owu li unene momasiku Omandaaha nEtitano, sho komatala ku udha ookasitoma. Aalongwa yamwe ihatu ya mono momasiku moka,” ta popi ngaaka.

Ta ti mboka haya fawula oyo ngaa mboka yaa shi sha mosikola.

Frans ta hokolola kutya, opamwe naalongi aakwawo koosikola dhimwe, oya kala nokupopya naavali yaamboka haya faula oosikola, ihe ohaya yamukula kutya kaye mo mondoolopa manga oya ka longa omapya gawo omanga yamwe taya yamukula kutya nayo oya nyengwa kaanona yawo. 

Omukuluntu gopolisi moshitopolwa shaShana Naftal Lungameni Sakaria okwa zimine kutya, oku na ontseyo yehokololo ndyoka, ihe oya kala nokukambadhala okulonga naanona mboka yaa kale mo we momatala.

“Sho osho shoka, ngele ya mono opolisi ohaya matuka po, ashike itatu sholola ihe otatu tsikile,” ta ti ngaaka.

Sakaria okwa ti okwa li a lombwelwa komukuluntu gumwe kutya okanona ke ohaka ka konga iimaliwa komatala taka zi kOngenga.

Ta popi nongeyo kutya, shoka tashi ningwa kookasitoma osha puka, ndyoka ehepeko lyaanona, sho inashi pitikwa kekotampango lyaNamibia.

“Kehe ngoka ta ka adhika ta longitha aanona mboka momatala, naye ota ka mangwa po,” ta tseyitha ngaaka.

Omupopiliko muuministeli wuuthemba womuntu Lukas Haufiku okwa ti, shoka tashi ningwa komatala gaShakati osha puka noonkondo, oshoka ndyoka ehepeko lyaanona.

“Oshigwana nashi hulithe po okulongitha nokufuta aanona yosikola, oshoka ngele kape na oshimaliwa nayo itaya hala okuya ko komatala. Ngele otaya tsikile oku ya pa, nena nayo otaya xwaxwameke onkalo ndjoka,” ta nyenyeta ngaaka.

Omuxwaxwameki gomOshakati Nikanor Iipumbu okwa ti, aanona mboka yaAngola ya kala ye li momapandaanda oyo ya gandja oshiholelwa kaanona Aanamibia kutya nando itaya yi kosikola otaya vulu okumona oshimaliwa momapandaanda.

“Epangelo lyetu inali ethela mo we aanona mboka yaAngola. Otandi li pandula oshoka olya kala nokukambadhala oku ya shunitha koshilongo shawo,” ta ti ngaaka.

Onkambadhala okupopya nomukuluntu gwelongo mOshana, Pauline Shapumba oya hulile muunyengwi sho anuwa a li e li moshigongi pethimbo ndyoka.

-vkaapanda@nepc.com.na