Ministeris ǂNamipeb !Ûi!gâs, Haiǂgās tsî !Narisarimas dis ge ǀAeǁgams di ǁanǂgāsabena ra ǂgan, ǁîn ǀurixa ǀawon tsî ǂûna !aib ai nî mûsense i mâsiba xu ūbēsa, ǁnāpab ǀnai ǀnoran ra khoen ǁgâuǂnamigu !nâ uriǂgâ tsî ǂkhôaga dīs !gomsiba hâs mâsiba ǁkhaes !aroma. Nē ǂgans ge ǁnāpan ge ǂauna !gomsina ǀgūǁae ǀAeǁgams di ǂnaumâiǁanǁguikha, Goreangab tsî Kwanangombe hâkha !nâ a !nurihes khao!gâ ge sao. !Nurihe ges ge, ǀnoran khoen di omdi ǁgâuǂnamigu !nâ uriǂgâ tsî !augan ra mûmâ xūna ǂkhôadī tsî ǀnî xūn tsî ǂûn tsîna ra !nari !khaisa. 

Nē !gomsigu ǂnamipes ge ministerisa mâ ǀawedes nē mâsiba oresa hōbas !aroma ūhâs ǂnamipe ge mî, ǁîs ǀnorana khoen ǁaeguba xu kaise !nūse nî doe-ū !khaisa, ministeris di mîgowaba-aob Vilho Hangulab gere mîsa !oa. 

Kai !gomsib hîa nē mâsiba ra hirihiri!nâb ge, ǂûn hîan khoena mûsase jardi !nâ ra ūhâ tsî ǀnorana kai !ādi !nâ ra ǂgae hāna. 

“Sida ge nē mâsib xa ǂansa ūhâ, tsî !hara da ge o da ge hōǂui !khais ge, ǀnoran ǂûna ǀgūǀkhās !aroma ra ǂgâ !khaisa. 

Nēsib ge ǂhanuba a ǁaxa hâhâ nî oresa nē mâsiba hōbas ǀawedi ǀkha. 

Xawe, da !ereamsa !âu hâ ǁaeb !nâ ta ge ra ǂgan, în khoena ǀawon âna !gâi ǀgaub !nâ ūhâ, ǁîb nē xūn hoan di !gomsib ase ra hōǂuihe amaga,” tib ge Hangulaba ge mî. 

!Khâikhom tsîb ǁîba ai!â noxopa gere mî !khais ge, ǁanǂgāsaben tsî ministeris tsîn hoan mā-amsa tama hâ !khaisa nē ǀguruna tsûtsû tamas ka i o ǂnoa nîse isa. “ǀAeǁgams !Ā!khōmais ǀAwa!namn, Namibiab ǀAwa!namn tamas ka i o Namibiab ǁKhaubasens ǀHûs hân ǀguin, ge ǂhanusi mā-amsa ūhâ, ǀAeǁgams !nâ !apuna sîsenūsa tsîs ge nēsa sida nau da !aroma supu tama hâ.” Nēs ǀkhāb ge Hangulaba ǁanǂgāsabena gere ǂgan, in ǁîn di sîsenǁareba mā î da nē ǀnorana !gâi ǀgaub !nâ, tsûtsû tamas ka i o !gams ose, !nūse khoen ǁaeguba xu ī-ū