OSHAKATI – Okundjondjela iingangamithi mondholongo yaShakati okwa lopotwa taku indjipala sho kwa mangwa ishewe omulumentu gumwe mehuulilo shiwike, konima pwa piti ashike iiwike iishona sho omulumentu gumwe a li a mangwa omanga kwa li ta kambadhala okuyakele iingangamithi mondholongolo. Olundji aanandholongo anuwa ohaya etelwa kaantu mboka ye li kondje omanga yamwe haya pitithilwa kaapolisi, yo taye ya futu.
Omulumentu gwomimvo dhopokati okwa mangwa po kopolisi mOshakati sho kwa li ta kambadhala okuyakela iingangamithi mondholongo, eyitula momuti gwokomayego. Opolisi moshitopolwa shaShana oya lopota kutya iingangamithi mbyoka oya li yina omundjundo gu thike poogalama 55.
Natango omwedhi gwa zi ko okwa lopotwa omulumentu gwomimvo 30, a mangwa sho a li ta kambadhala okundjondjela omapangwe osho wo omakaya goYes mondholongo yaShakati.
Omapangwe ngoka oga li gena ongushu yoshimaliwa shi thike N$2 000, omanga omakaya goYes ge na ongushu yoshimaliwa N$41. Otaku hokololwa kutya aanandholongo oye li mo taya ngeshefa iingangamithi shoka sha nika oshiponga. Omukuluntu gwopolisi moshitopolwa shaShana Naftal Lungameni Sakaria okwa ti onkalo ndjoka kayi li mondjila, notayi piyaganeke aanadholongo.
“Aanadholongo ngele otaya pewa iingangamithi mondholongo nena otaya piyagana momadhiladhilo e taya longo iilonga inaayi uka,” ta ti ngaaka.
Ta ti, shoka natango otashi vulu okweeta evundakano mondholongo nenge okutula oonkalamwenyo dhaapolisi moshiponga. Ta gwedha po ta ti, opolisi otayi tsikile okulonga nuudhiginini okukwashilipaleka iiningwanima yi li ngaaka itayi holoka we.
“Otandi pandula aapolisi mboka taya longo nuudhiginini osho wo nuuyuki,” ta pandula ngaaka.
Omumvo gwa yi natango okwa li kwa mangwa omupolisi mOshakati sho a li a kambadhala okuyakele iingangamithi mondholongo.
“Omupolisi ngoka okwa li a mangwa nokanayilona okaluudhe ke na iingangamithi yi na ondjundo yookilogalama 35 yongushu N$1 750 osho wo omakaya goYes ge li 77 gongushu N$154, pethimbo e li miilonga,” Sakaria ta hokolola ngaaka. Sakaria okwa ti onkundana ndjoka otayi sitha ohoni, omupolisi ta yakele iingangamathi mondholongo omanga oye e na okukeelela iimbuluma.
Omukuluntu gwopolisi Sakaria okwa ti natango omupolisi gumwe mOshana okwa li a patululilwa oshipotha shelongitho lyiingangamithi osho wo okukonda oompango dha tulwa po okukondolola iikwamakaya.
Sakaria okwa ti oshiningwanima shoka osha holoka omanga omulumentu ngoka a li e li miilonga moshitaasi mOndangwa.
Otaku hokololwa kutya omupolisi ngoka okwa li i iyaka mehala lye lyiilonga ndyoka lyi li kokule kashona nondjedhililo yanaandholongo hoka anuwa a adhika kaapolisi aakwawo, nooondjato dhombulukweya dha tumba.
Ta ti, shoka anuwa kwa li sha limbililike aapolisi aakwawo ooshoka omayinyengo ge ga li ga tameke okulimbililika.
Omupolisi ngoka anuwa okwa li a kambandhala okumatuka po sho a pulwa kutya ota ningi shike kombinga hoka e ta tidhwa sigo a kwatwa.
vkaapanda@nepc.com.na