KATIMA MULILO – Katengo kakabona za zwelopili nikutusa mwalinako za ziezi ili kakazibahala ka ADRA mwa Namibia, kasweli kutaleleza projekiti yetalima zakutusa babanca ya bulalu (YEP III), ili kubata kukonkiseza lituso hala maino, tundamo, ni ketelelo ya banana ni babanca mwasikiliti sa Zambezi.

Hana bulela kwamukopano one umemile bayemeli kuzwelela maofesi ashelashelana mwasikiliti sa Zambezi Labulalu, kuzibahaza projekiti nikuhulisa swalisano, ni likezo zelukela hala kutatulula butata bobukataza babanca ni sicaba. Muzamaisi waADRA Namibia mwasikiliti sa Zambezi, Elsie Mabuku, naize YEP III yene kalile mwa kweli ya Yenda 2025, ikamata lilimo zetalu kuisa Ñulule 2028. Mwanako yeo projekiti ilela kutusa babanca ni sicaba kakubafa lituto zabupilo, buikezezo hamoho cwalo ni pabalelo yasilalanda.

“Projekiti itusa banana babalikana myanda yemibeli (babali mwahala 6-14), ni babanca babalikana myanda yemine (babali mwahala 15-24), bashemi ni bababaleli babalikana 250, tutengo tuketalizoho totufumaneha mwahala sicaba, ni babahulu bamashumi amabeli babasebeza kutusa ni kuluta banana kuli bakone kufumana lyano la butokwa mwabupilo bwabona,” nekubulezi Mabuku.

Naekelize kuli katengo kaADRA hakakoni kutaleleza lika zeo kaufela kanosi, kikafo nekubizizwe bayemeli ba maofesi amañwi kuli bakone kuswalisana hamoho mwakutusa sicaba sa sikiliti sa Zambezi. 

“Kacwalo, projekiti kiyabutokwa kakuli ibabaza kuzwisezapata buino sakata kakutahisa lyano mwasilalanda, nikuyandulula ketelelo sakata mwahala babanca. Swalisano ya bayemeli kaufela kiyabutokwa kubona kuli project yeo yatalelezwa nikutisa cinceho mwasikiliti sa Zambezi,” nekutolokile Mabuku.

Muinasipula wakatengo kakaketilwe kutaleleza projekiti mwasikiliti sa Zambezi, Reagan Musunga, naize babaketilwe kuluta nikuetelela babana, kibao babana ni zibo ye ipitezi yekona kubapala kalulotuna kubupa nikubakanya bukamuso bwabanana mwasikiliti sa Zambezi.

 “Zibo yebana ni yona hakizibo yebakona kupumbeka… Batu ba bakona kueza jamu kakusebelisa limbule. Batu ba bakona kueza mulola wakutapisisa libyana, ili taba yaniti; mulola wakutapisisa mikeke, ili taba yaniti yebakona kueza. Kacwalo lusebelise batu ba,” neku susuelize Musunga.