Omunambelewa konooli wehangano lokuyandja ohonde loNamibia Blood Transfusion Services (NAMBTS) Adolf Mwafangeyo okwa ti ehangano lavo ola yandja ohonde kovanhu vahapu va kwatwa komalaria pefimbo eli lodula.
Okwa yelifa ta ti paife omwaalu wovanhu va kwatwa komalaria owa londa pombada osho sha eta ehangano li yandje ohonde kovanhu vahapu.
Mwafangeyo okwa yelifa ta ti eshi otashi ulike kutya ohonde oya fimana okuxupifa eemwenyo dovanhu ve li moipangelo.
“Ngeenge atu lombwele oshiwana shi ka yandje ohonde ohashi kala tashi ti pamwe omashendjo. Omunhu ngeenge okwe lihange e li moshipangelo opo nee ha kala e na eudeko lefimano lohonde shaashi ye mu kwafela,” ta ti.
Okwa weda po ta ti ohonde ei tai yandjwa koshiwana ohai kwafele ovanhu ve na omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.
Okwa lombwela oshiwana opo shi topolelafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde.
Mwafangeyo okwa pula oshiwana opo shi holoke momwaalu muhapu oku ka yandja ohonde shaashi osha fimana.
Okwa weda po ta ti endiki lavo li li moshipangelo shaShakati ohali longo Omandaaxa keshe okudja potundi 10h00 fiyo 18h00.
Okwa panduala ovanafikola novalihongi aveshe ve na ohokwe yokuyandja ohonde shaashi eshi otashi tu ovanyasha vakwao omukumo.
“Eemwedi da pita otwa didilika oshitukulwa shaHangwena shi li pombada mokuyandja ohonde. Otwa pandula oshiwana,” ta ti.
Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe.