OSHIKUKU – Osekundofikola Nuuyoma otai twikile okukaleka po efimano lomifyuululwakalo neenghulunghedi omo eefikola 28 da li da kufa ombinga koshivilo shomifyuululwakalo sha li ko oshivike sha dja ko.
Eefikola da dja koitukulwa ya yooloka okwa li tadi kufa ombinga momafiyafano paendodo yeenghatu da yooloka ngaashi onghatu yeeprimafikola, eesekundofikola osho yo oiputudilo yopombada.
Ongenga English Private School oya findana ponola yotete ya fiya po eeprimafikola adishe.
Mwaala Secondary School okwa findana ponomola yotete ya fiya po eesekundofikola adishe.
Oshiputudilo shopombada shaUNAM shedina Hifikepunye Pohamba osha fiya po oiputudilo ikwao eshi she ya ponomola yotete.
Omuhongifikola pofikola opo Hafeni Tuhadeleni okwa ti efiku lomifyuululwakalo ola enda nawa molwaashi inava didilika oupyakadi washa.
“Ovanafikola okwa li va fewa va djala omidjalo domifyuululwakalo. Ovanafikola okwa li tava dana nokwiimba oidano yO shiwambo,” ta ti.
Okwa weda po ta ti ovanafikola okwa li natango tava ningi oinyangadalwa yOshiwambo ngaashi okutwa oilya, okuyenga odjove nosho tuu.
Tuhadeleni okwa hokolola ta ti oshivilo shomifyuululwakalo osha fimana shaashi otashi yandje ehongo kovanafikola nghene omufyuululwakalo u na okulandulwa.
“Omufyuululwakalo owa fimana shaashi otau kwafele ovanafikola va kale ve na outeku muwa nokukala va fimaneka ovahongifikola osho yo ovakulunhu,” ta ti.
Okwa weda po ta ti ngeenge okaana oke na eudeko kombinga yomufyuululwakalo otaka kala ke na oumbada wokulonga oimbuluma osho yo okulongela vakwao omunyonena.
“Omifyuululwakalo otadi kwafele nghene okaana kokamati ile okakadona ke na okulihumbata,” ta ti.
Okwa weda po ta ti oshivilo eshi osha eta elunduluko liwa mofikola yavo shaashi ovanafikola ohave lihumbata nawa osho tashi ulike kutya ova fimaneka omufyuululwakalo kutya omunafikola okwa pumbwa okulihumbata nawa.
Okwa pula ovadali opo va twikile okulonga ounona vavo kombinga yefimano lomufyuululwakalo.
Efiku olo ovanafikola okwa li tava landifa oikulya yOshiwambo mwa kwatelwa omalodu osho tashi ulike efimano lefiku eli.