Abraham Mwanyekange
Omunashipundi womaudano okodula edina Onzimbogo Lennen Shikongo okwa ti otonamende yaNzimbogo noneudo oko i li, tai ka hovela okudja momafiku atatu fiyo ahamano Aprili neudo, notai ka danenwa kokapale komaudano Embadu mOshakati.
Shikongo okwa ti neudo otashi ka kala oshikando oshitimuwoyi Onzimbongo tai danwa.
Okwa indila ovaholi vomaudano opo ve uye va kufe ombinga komaudano. “Okatanga kokeemhadi ohake tu pe eemhito diwa okushakeneka ookaume vape, okudja keenhele da yooloka nohashi tu pe nee eemhito diwa dokushivafana,” ta ti.
Shikongo okwa ti okwa pandula unene oohandimwe ovo va yambidida Onzimbogo opo i pule komesho noneudo.
“Katu na omukwashilipaleki nghee twa tamekele momudo 2018 ashike otu shi oku pandula oMarikana Driving Academy, Ya Choice Auto, Onekulo Lounge osho yo Kasopa Nation ovo ngaho tave tu undula opo tu ete ovanyasha pamwe,” ta ti.
Ta ti elalakano lotonamende yOnzimbogo okuyambulapo oitalendi yovanyasha momidingonoko opo va mone eemhito di li nawa meenghalamwenyo davo.
Okwa ti omufindani wotete ota ka yambuka po noshimaliwa N$20 000 ekopi neembadi 18, omutivali N$9 000 neembadi omanga omutitatu nomutine tava pewa N$3 500 keshe
umwe.
Omafindano oohandimwe ongaashi omutulimo weekoola dihapu, omudani dingi moudano nomukwati dingi wotonamende navo otava ka pewa sha.
Odula ya dja ko efindano okwa li la ya nOnzimbogo FC, ya ninga haluni nopeumba.