Pauline Diamond 

Indjii oondaze yotjikoro notjivara ndja putuka mombongarero ondenga ondwirise yorutu romitanda vyOvaherero mOtjauana ndja haamene otjikando otjitenga mOmahalapye tja Tjauana Oroviungura ndazuko. Ombepo yombwaneno noutongatima wombazu ondjaa ihinge pombongarero indji pupari ovanane votjiwaņa, ovakuru vatjo nawina omitanda mouparanga worukondua rwa Tjauana ovandu avehe muvari nondando imwe uriri ndjiri okunyomona ombwaneno nokutuna ohani ndjiri mokati kotjiwaņa tjOvaherero. 

Tjapatururire ombongarero Okomusara yOkehi yOkarukondua, Collen Tubego, wayanjdere ondangu komitanda vyOvaherero okuwomborora otjiwana mokunyomona ombwaneno. Ama yauza ohepero yondungiro yotjiwaņa tjitjimuna oruyaveze tjimwe nawina tjondando imwe. 

Mozondunanÿari pombongarero indji mwari Ombara yOvaherero, Bontle Samuel Maharero wina  ngwa kuramenepo Omuhona Tshipe Tshipe wa Mahalapye, novahoma oo Karijanua Kahaka na Kenandjo Kahaka va Makaku. 

Ombazu kambazu mu mwari ombimbi nawina omuzaro wotjiserandu nomaimburiro wokatikisa, oviritje nomihiva noutjina ovyo mbya kunine otjivepo tjombwaneno nowu umwe. 

Ngwatoororwe otjOmutjangepero Omunene wOtjirata Tjomitanda tjOvaherero, Rudolph Kuzatjike, we vi tokere oku pukata ombazu no ku kambura omerizirira wokutakamisa ombazu yavyo. 

Natja ombongarero indji ondanaukiro nu katjitjitua porwe nungwari omautiro wotjivepo tji ma tjiwaneke Ovaherero okutuurungira mekuruhungi, ombazu noumune imwe ohunga noruyaveze rwawo avehe pamwe otjomundu umwe. 

Operesidenda, Eric Tjiriange, wa tjivisire kutja otji tjitwa itji matjirire otjombura aihe. Ama pambarere otjikamangarate tjondungiro yorutu romasa nombwaneno ndu ma ru zuvarisa ozonÿero zOvaherero avehe mouparanga wa Tjauana. Oku nyomona ombazu nomivrumwatwa vyayo; nokumema otupare two ngorongova tu ma tu pwisa no ku parura avehe.