Abraham Mwanyekange 

Kansela woshikandjohoololo Ongwediva moshitukulwa Oshana Johannes Ngololo okwa indila ovakalimo vomOngwediva opo va katulife eendongi neengobe oupapa osho yo omapaya. Oupapa nomapaya otaa kelele oiponga yomeendjila efimbo lokonguloshi. 

Ngololo okwa ti oovene veengobe osho yo eendongi odo hadi ende nokunapa popepi neepate ovo va talika va katuke tete. Ta ti ovo ve li  popepi nopate ngaashi Omatando- Onamutai oshoyo vokuAdolf ya uka kOngha. “Ileni kombelewa yoshikandjohoololo opo tu tule oinamwenyo yeni oupapa nomapaya tu ngabekeni oiponga yomeepate yomoshikandjohoololo shetu,” ta ti. 

Enenedilaadilo loupapa nomapaya oinamwenyo ola etwa po kouministili woyeendifo noilonga odula ya dja ko. Ouministili odula ya dja ko owa ti owa tula poshitaafula oshimaliwa shi fike peemiliona N$5 shokulanda oupapa nomapaya. 

Novemba wodula ya dja ko ominista yoyeendifo noilonga Veiko Nekundi okwa ti ouministili otau ka pulifa komesho enenedilaadilo  lokukandeka oiponga meepate. 

Ehangano loMotor Vehicle Accident (MVA) Fund ola lopota kwa ningwa oiponga yomatuwa neudo okudja muJanuali fiyo Mei neudo i li 1 033. Ovanhu va mona oiponga ove li 1 709 nomafyo 179. Olopota yo-MVA Fund inai popya kutya oiponga ingapi ya etwa koinamwenyo. 

Omunambelewa wokoNational  Road Safety Council Ambrosius Tierspoor odula ya dja ko okwa lombwela oshifokundaneki shoThe Namibian ta ti ova landa oupapa ve li 10 000 osho yo omapaya 10 000 opetameko. 

Oshitukulwa shaMusati, Oshana, noKhomas oyo ya ninga oinelao okutamekifa opologalama youpapa nomapaya. Omusati ota u pewa oupapa nomapaya 7 498 okuya kumwe, Oshana 7 306 omanga Khomas ta pewa 5 196. Opologalama oyo otai kwata eemwedi nhatu fiyo hamano. Oupapa nomapaya otava yandjwa oshali nonghee kape na ou taka futifwa. 

-amwanyekange@nepc.com.na