OSHAKATI – Aahingi yootaksi oya indile oshigwana shi tameke okufuta ondando yotakisi ya tulwa po yo-N$15, ihe hakutya oye na po N$10 nenge N$13, okuza ohela. 

Aahingi yootakisi oya indile ngaaka konima ondando yotakisi ya gwedhelwa oku za nena. 

Minista gwiiyenditho niilonga Veikko Nekundi okwa ti okutameka nena ondando yotakisi otayi gwedhelwa okuza poN$13 yi ninge N$15. 

“Otwa kutha etokolo ndika konima aahingi yotakisi ya ningi ethimbo taya nyenyeta kutya omahooli ohaga gwedhelwa omwedhi kehe, omanga ya ningi ethimbo inaaya gwedhela ondando yotaksi,” ta fatulula ngaaka. 

Ta ti, otaksi oya ihula okugwedhelwa mo2021. 

Omuhingi gwotaksi mondoolopa Oshakati, Ongwediva nOndangwa, Thomas Kamati okwa ti omahooli oga ninga ondilo, onkene inaya hala ookasitoma tadhi ti odhi na po. 

“Onda hala tu longele kumwe naahingi yootaksi ayehe kutya, inaya faalela mboka taya ti oye na po opo ashike ya igilile yo ya simaneke ondando ndjoka ya tulwa po. Oshoka ngele opwa kala mboka taye ya sile ohenda nena itaye shi hulitha po,” ta popi ngaaka. 

Omuhingi gumwe natango, Ismael Kalitheni okwa ti, ookasitoma ohadhi ningile owina, sho otaksi yina N$15 paife, otaya ti oye na po N$13, ashike nale sho ya li pondando mpoka okwa li haya kala ashike ye na po N$10. 

“Oshike ngele taya yi moositola ihaya ti oye na po, ohaya landa ashike kondando ndjoka ya tulwa po? Ookasitoma nadhi simaneke wo iilonga yetu,” ta indile ngaaka. 

Minista gwiikwafaabuilika, oomina niikwankondo Mondestus Amutse, oshiwike sha piti okwa pititha kutya omahooli oga gwedhelwa. 

Sha ikolela komushangwa gwa pitithwa, omahooli agehe oga gwedhelwa, opetolola oya gwedhelwa N$1.40 molita, omanga odissela ya londo sigo N$4.63. 

Sha ikolela kuuyelele wa li wa pitithwa po kuuministeli wiikwamina omahooli oga kala nokulonda molwaashoka oondando dhomahooli inaaga dhindwa nadho odha kala nokulonda koEurope, hoka kwa ikwatelela omatokolo gelundululuko lyomahooli. 

“Opo uupyakadhi mbuka wu kandulwe po, otashi pula iilongo yaAfrica okumanga uukumwe kumwe okudhinda nokukondolola eyete po lyomahooli shoka tashi ka pula oobiliona ondhindji,’’ ya fatulula ngaaka. 

Ya gwedha po kutya etokolo ndyoka kali shi epu no ita li ningwa pethimbo limwe, ihe ota li ka kwathela egwo pevi lyongushu yondando yomahooli. 

Omwedhi gwa zi ko omahooli okwali natango ga gwedhelwa, sho opetolola yali ya gwedhelwa N$2.50 omanga odissela yali ya londo sigo N$4.00 molita. 

-vkaapanda@nepc.com.na