ONGWEDIVA – Oshiputudilo shoInternational University of Management sha shivika nawa IUM otashi ka tunga oshipangelo shopaumwene modoolopa yaNdangwa omudo tau ya.

Oshipangelo otashi ka tungwa shi na eembete 120 nelalakano lokutambulila mo ovanaudu.

Omukulunhuwiliki wo-IUM noku li omutotipo woshiputudilo eshi Pro David Namwandi okwa koleka onghundana ei.

Meenghundafana naKundana, Namwandi okwa yelifa ta ti ota ka kundafana nouministeli wouhaku opo va pewa omikanda doshipangelo okukala tashi deula ovanailonga voundjolowele.

Okwa weda po ta ti oshipangelo otashi kala tashi yandje omayakulo ouhaku kovanaudu osho yo omadeulo kovanyasha tave lihongelo eifano louhaku. Okwa ti IUM ota lalakanene okueta omayakulo popepi noshiwana osho yo okuyandja ounongo kovalihongi.

Oshivike sha dja ko IUM okwa yandja eedjapo kovalihongi ve fike 1400 eshi a va dja omanguwo mOngwediva.

Ovalihongi ove li hongela omaifano a yooloka, omo mongula tava ka ninga ovanashilonga va yooloka. Namwandi okwa ti ovalihongi ova dja koiputudilo ngaashi Ongwediva osho yo koNkurenkuru. Okwa yelifa ta ti mopaife ngaha IUM okuna oiputudilo i li koitukulwa ngaashi Ohangwena, Oshana, Erongo, Kavango East osho yo moshilandopangelo. “IUM ota ende ta xumu komesho paife molwaashi omwaalu wovalihongi nawo owa ninga uhapu. Omudo keshe ohatu ya kula omaindilo aahapu okudja moshiwana sha okulihonga koIUM,” ta ti. 

Okwa yelifa ta ti ovaholingi 2060 ova taalelwa okukala va dja omanguwo koshiputudilo shomo Windhoek.

Namwandi okwa ti IUM okuna omaifano te li hongelwa 122 ayeshe a tambulwako kehangano olo ha li tula eedjapo koshihalo. 

fhamalwa@nepc.com.na