Khorixas
Ai!â gere ǂoa wekheb di Donertaxtsēs ai ge Khorixas !nâ ūhe hâ i ǀhûhâsib ǂnûs tawab ge Khorixas ǁHûi!nâǂharis ǂGiǂgosi ǀAwemā-aob, Elias Xoaguba 780 !khaeǀkhādi ǀgâna ge ǀkhae ǁnāpa hâ ǀgaisa ǀkhurub mâsiba Khorixas ǂnamipeb ai oe-ams ase. Nē ǀkhaeb ge !gôa!gôahe rasa !oa N$70 000 marisa !nā hâ tsî noxopa ra ǂharo !narixūn tsî !khauǁnuib ga !gôasīheo.
“ǁNāpa da ǂhanub nî mā huiba !âuhâ ǁaeb ai aibe nē huiba ū!oaba te re. Tita ge nē ǀgâna ti maris ǀkha go ama, xuige ǂkhîb tsî ǀnammi !nâ ū!oa re,” tib ge Xoaguba ǁnāpa ge ǀhao hâ i khoena ge ǂgan. Nēpa ge ǀhao hâ in ge ǂnûǁkhaeba-aon !hao!nāsi ǂgaeǂguidi, ǂgaiǀons ai Dâuredaman, ǂAodaman, !Hâu!gaen tsî ǀGaiodaman tsîn dina tsî noxopa !ā!nāsi ǂgari-aon tsîna.
!Aruǀîb ge Xoaguba ge mî, ǁîb ge ǀnai ǀnî marisa ǀnî skolga a ǀkhaesa tsîb ge ǁîba khoen hîa ga noxopa ǀgâna a ǁama ǂgaona ra ǂgaoǂgao!nâ in tā mâ-oa tsî nē ǁkhōǁkhōsa ǀkhuruba ûi!kharus !nâ naun hîa a ǁkhāsio!nâna hui!khoe-am. Xoagub ge ǁnān hîa ge nēpa ǀhû hâ in xa gere dîhe tare-eb ge nē !kharu ge ǁkhaisa ǁkhâgu ǁaeb !nâ ǀnai dī hâ isa nē khurub mâsiba Khorixas tsî ǂnamipeb !nâ oe-ams ase. Xoagub ge nēs ai !eream tsî ge mî, ǁîb ge mâsiba ai!â ge hâ i ǂgaeǂguisa xu ǁnāti a ǀumisa xaweb noxopa a ǁaxasa ǁîb ǀaweǁguigu ǀkha mâ ǀgaub aib !gâiǂâu hâse nē mâsiba a oe-am ǁkhāsa. Xoaguba xūn khoena gere ǂan ǂgaos ge ǁîb ge Khorixas ǁHûi!nâǂharis ǂGiǂgosi ǀAwemā-ao kaitoas khao!gâb mâ ǁgariǁgarisa ǀaweǁguiga ge a ūsa ǀkhurub mâsib ǂnamipe tsî mâpab ge huib !aroma gere !gubu-ams tsîna. Xoagub di oe-ams nē dîdi ais ge ǁîb beros noxopa ǀaweǁguigu ǀkha a ǀhawesa.
Xoagub ge nē ǂnûsa ge ǂanǂan N$50 000 maris hâsa Kuneneb ǀKharisi ǀAwemā!nans ǀkhāba xu tsî khoena ge ǂgan in ǂhaitsi ǂnûdi !nâ mîǁgui mâtis nē marisa nî sîsenūhesa ǀkhurub mâsib !nâ huis !nâ. ǂGari-aob, Gideon Gurirab ge aoǁguiba ge dī, îb Kunene ǀKharib tsîna huiba ôatsoatsoa Erongo ǀKharib ǂgaeǂui-aon aiǁgausa sao tsi, !gōsase ǂharugun tsî mainde ǀgūǀkhasa ǀkhurub huib !aroma. ǁHao-aon nē ǂnûsa ge ǁhao!nâ hâ in, !gôa!gôahe rasa !oa 100 xa ge !nāsa in ge ge koasa Xoaguba ge mā ǁîb hoaǁae ra dītsâ ǁîb di ǁhōsa xu huiba māsa hâ ga mâsin ǂnamipe, xawe ǂâiǂhansensa gere gowaǂui ǂhanub ǀkhāba xu hâ !nubusib nē ǁkhōǁkhōsa ǀkhuruba oe-ams dib ǂnamipe.