Nkurenkurus
ǂAuna a xawe mîheǁoasa !gôab di ǁkhāǁkhāsenaon !kharaga skolgu Kavangob Huriǂoas din ge ǀgaisa ǁgoaǂuide ra hō!â, aiǁgausen ǀaon hîa ǁnā tentdi, ǀgaisa !nubusib ǁkhāǁkhā!nā-omdi dib, !nāsa !âgu ǁnā ǀkharib digu !nân xa ra !aromahese ǁkhāǁkhāsa ra !khō!oa!nâdi ǂnamipe ra hâman xa a nâhe ǁkhās din tsî noxopa ǂguina.
ǁKhāǁkhās tsî ǁkhāǁkhāsens !aroma a ǂhâbasa huisenūxūn di !nubusiba ǀgaisase ūhâ ǀkharib nēb ge ǁîb ge hoa ǀkharigu xa ǂkhawusase ǂoago kurib di Xrat 12 !nurigu !nâ a dība. New Erab ge Kulisuka Junior ǂAm Skola ge sari hâ i hîa koro tentdi !nâ ra ǁgau!nâna, nē skoli ge ǂoago kurib ai a tsoatsoahes khao!gâ. Nē skoli di !huis ge ǁgûn di ǂgans ǀkharib di Mûǂamaos, Sirkka Ausikus ai, in ga ǁîn ǀgūse skol-e a hā-ūbahe ǁîn ôan kaise !nūse ǁîgu a ǀgū skolgu ǁga ra ǀnopa ti hâsa xu ge !hui. ǀNî ǀgôan ge ǁaupexa 5 kilometerga ǁîb a ǀgū skoli ǁga skol!gû tsî ǁkhawa ra oa tsîn ge !gōsase xrat 1s ǀgôarona a ǁkhā ǁoa ǁnā-amagas ge nē tentdi ge ores ase a ǂgâxasa.ǀGui ǁgau!nâ-ao-i hîa New Erab ǀkha gere ǁgam-i, ǀons ǂgaihe tidese-i, ǁgau!nâ-aon mā-amsa tama ǂhôare-aon ǀkha ǁgamǁaresa amaga-i ge gere mî “Nē ǀgôan ge ǁaekorobe ǀaona nē tentdi !nâ ra !gam. ǁAris, (Mantaxtsē) go is ais tsînan ge ǀguiba go !gam. Sida ge ǀgui ǂnuwisa om-i tsîna ūhâ tama hâ tsîn ge skoli ǂnû-ai!naodi tsî xūna tsīkorobe ra tanibēhe.”
ǁKhāti hâ !khais ge nē tentdi !nâ ǁkhāǁkhās nē ǀgôana !gâi tsî īǁoasa ǁkhāǁkhā!nâ ǂnamipeba mā tama hâsa, ǁaupexan 50 ǀgôana mâ tents hoas !nâ ǀāǂgāsase ra ǂnû amaga. ǂAuna ǀgôan ge ǀaogu ǀkha hā ǀhaosa !ao tsî !onkhao hâse ǁgoaga ra hā. ǀAon ge !nomasasiba nē tentdi !nâ ǀgūse goe !garo!khaiga xu hā ra ôa tsî ǁom!khaise sîsenū. “Amaba mîba tsis xa da ge sida noxopa nē kurib ge tsoatsoasa xu ǀgaisa xū-e dī tama hâ ǁkhāǁkhā!nâs mâsib nēsa mā-am tama amaga. Tentdi !nâs tsîna i ge kaise !khae tsî da tentde nî ǀhui-ams kara ob ge ǂoab tsî ǀnanuba nēsa ra īǁoa kaiba da,” tin ge ǀnî ǁgau!nâ-aona gere !gae.
New Erab ge Kanuni Haruwodi !Amǁaresa Skoli tsîna Nkurenkurus !nâ ge sari hâ i, ǁîn tsîn ǁkhāǁkhā!nā-omdi !nubusiba oe-ams ase ǀgam tentra !nâ ǁgau!nâsa ra māna. Mantaxtsēs aira ge nē ǀgam tentra ǀgaisa ǀnanub tsî ǂoab xa doa!āhe tsî ǀgarusase ge ǁgoe i.
Nē tentra ge ǀgam xrat 5 !gubira ase gere sîsenūhe. GCwagi ǂAm Skoli hîa Bunya !âb !nâ mâb tsîn ge ǀgam tentra, ǀguisa Xrat 4 di 34 ǀgôan !aroma tsî nausa Xrat 3 di 43 ǀgôan !aroma ra sîsenū tsî ǁkhā !gomsiba ai!â go mî hâ i skolgu ǀkha ra ǀgoragu.