Mbunga politika zaSWAPO kapi zina kukandurapo egano asi vantu ava kavatjidire kuvhura mwaza mazuva vakatengure kombunga ezi.
Nsene asi ngava tambura asi eyi vana vatjidire morwa epuko varugana kuvhura kuvatambura vatengure. Ndi nsene vagava asi yinke vana harere kutengura hawe kuvhura ehundiro olyo kulitarurura nokuvapulisira vatengure.
Hamutjanga ntoni gombunga zaSWAPO, Nangolo Mbumba, katente mbudi kosayitunga zaNew Era, apa kavapaparere mauzera kuhamena nombudi detjido mombunga zaSWAPO vantu ava vane. Nomu yina kara asi mpitisili gwambunga Elijah Ngurare, kuna kundindira komitiye zontjima ntjima zaSWAPO, zikature etokoro eli moyirugana.
Age kuna mutamba morwa kwabubuka poruzera asi kuna kuvatera mbunga ezi gatotapo Job Amupanda, novakwawo zokurwenesa asi vantu vahepa kugwana evhu.
New Era kapulire asi vene ava vantu ava kuna vatjida mombunga ezi eparu lyawo nalinye ndi hawe? Kwato kapi yakarako asi muntu vamutjide mombunga zaSWAPO eparu lyendi nalinye. Vahepa kukutjida makura konyima zosiruwo kuvhura okaligazare asi tani tengura kombunga zoge nokutanta asi morwa sinke ono kugazarera kutengura. Vantu kuza nye konyima taka gazara asi ndi takadimburura asi eyi narugana epuko makura takara nye negano asi nitengure ndi hawe.
Yimo ana kutanta Mbumba. Vane ava kavagwene nombapira dawo dokuvatjida mombunga zaSWAPO, edi katjenge Mbumba, kukwama etokoro lyombunga zoPolitBureau. Nampili ngomu asi Mbumba katente asi PolitBuro kuna tura tupu magano asi ngano vavatjide nye mbapira ezi zina tundu momberewa zendi kuna kulida asi vantu ava nare vana vatjida mombunga zaSWAPO. Kambala, Nauyoma ntani Amupanda kuna vatjida morwa kukara asi kuna kureta matjokaguro movantu asi vahakane evhu kupitira mombunga ezi vatotapo vana kutumbura asi AR, nelikwamo asi vahepa kugusa evhu kononkondo.
Ano Ngurare age kuna kara asi kuna kuvatera vantu ava asi vaze komeho nelikwamo lyokuhokona evhu. Mbunga ezi zoAR, kuna kara ngesi asi momazuva 31 Pembankuru vaNamibia navenye vahepa kulipakerera vahokone evhu melikwamo Nye vamwe kuna kupa mbunga zaSWAPO epuko asi kuna tjida vantu ava vahana kukwama nongendeseso douhunga.
Mbumba katente asi etokoro lyokutjida vantu ava kapi kalikere ereru ntani kalikere lyokukoresa komutjima.
Age kuna kurugurura ngorooro asi kukora komutjima nye nayimwesi novhura kurugana morwa vantu ava nawo kapi nye vana kurugana kukwama noveta. Mutaruruli gumwe goupolitika Hoze Riruako katente asi SWAPO kagendererre kutjida vantu ava.
Age kuna kuyimona asi ngano kavavapere mpito zokuvapurakena dogoro vagusepo udigu.
Vadinkantu ava kuvhura vakara nomagano dona morwa kuna kumona asi kapi vana kuvatekura nawa. Ano ngesi vahepa nye kutara maudigu gawo nokudiva asi yilye nawa nawa ana kara megendeso.
Eyi yina horoka mosikondovike kapisi kuyitara momureru, nye kuvhura kuretesapo asi vantu ava vakatotepo mbunga zawo kumwe nava vana kuvakwamako. Ndi asi nonkwami dawo.