SIBBINDA – Lizazi la basupali mwa lifasi (International day of old persons), kukona kuzibahaza linonge za bona, ne libile ni kupuzo mwa sikiliti sa Zambezi kwa Sibbinda, libima ze mashumi a supile ka lishumi lililimwi (80 km) wiko wa Katima Mulilo. Basupali neba putehile ka buňata kuyoikambota kaza maswenyeho a zabupilo bwa bona, mi ka nako yeswana ni kunyakalala kazeo bakonile kupeta mwa bupilo bwabona.
Muyemeli wa sichaba, wa silalanda sa Sibbinda, Ignatius Chunga, yo neli mubuleli kwa mukiti wo ne u ongaongilwe ki babeleki ba sichaba (Social Workers) ba likolo la Makete ni Pabalelo hamoho ni katengo kamuso ka kabona za mali a bao seba huluzi fa misebezi (Government Institution Pension Fund) ni swalisano ni katengo kamakopanelo ka basupali, u ize, basupali baswanela kubeiwa mwa misebezi ya lizwelopili.
“Le ki lizazi lelilelezwi kuzibahaza lika zeo liswenya basupali. Ha baswaneli kusiiwa kwa mulaho kuamana ni mingendenge ya lizwelopili.
Makolo a muuso, tutengo twa kwa mukunda ni tutengo totusaweli mwa muuso, tuswanela kuhupula basupali ni kufitisa tumbo kwa kalulo yeo ba bapalezi sichaba,” kwa talusa Chunga. Kakuya ka Chunga, ba supali bana ni liano la zibo, ku basiya kwa mulaho i taba kusialela.” Lusi talimi basupali kuba sitataliso. Mwahali kubona kuna ni matichele, linjimi, bazamaisi, baelezi kubala kuisa kai. Ba bapalile kalulo yetuna ahulu mwa sichaba saluna mi basasweli kueza cwalo. Lu ta bona kuli ba mwa silelezo sakata,” kwa talusa Chunga. U zwezipili kukupa mbweshafazo ya makete a basupali. Chunga u fitisize maswabi kwa kuendelela kwa taba ya mukwa wa kusebelisa buchwala maswe kwa basupali, ka kuekeza kuli ba lintolo za macwala ba babizeza fakaufi kakuba fa likoloti za bucwala. “Taba ye bilaeza ahulu ki minwelo maswe ya buchwala kwa basupali, ba bamwi kwa basupali ba sebelisa mali a bona a busupali ku leka bucwala kufitela kuleka lico ni liapalo. Ba bamwi kwa baluwi ba lintolo za bucwala ba bulukanga mapampili a kuholela mali a basupali kuli bakone kuyokwenuha hape kuto kolota. A ki mukwa o munde mi balikezo zeo mulao u ta bonana ni bona,” muyemeli wa sichaba sa Sibbinda a fa mamela. Maikuto a swana na fitisizwe ki muinasipula wa katengo ka makopanelo ka basupali, Borniface Limbo ya na ize, manduna ba minzi ba swanela kulwanisa taba yeo. “Lu utwile likezo za ku uzweza bachembele. Buňata bwa batu basweli kufumela fahalimu a bachembele. Lu sepa kuli mulao u tanga sibaka. Lu fitisa kupo kwa manduna ba minzi kueza sesimwi kuamana ni taba ye,” kwa kupa Limbo. Limbo hape na bilaelizwe ki taba yemwi, ya baikulu bao basiwa mwa pabalelo ya basupali. Mali a busupali ki a kutusa basupali ka za bupilo bwa bona bwa kamita kono kachenu le, ku fumaneha bashemi ba banyinyani baba siya bana babona kubabalelwa ki basupali ni kuba uta. Babamwi kubona a bana tokomelo kwa bashemi babona,” kwa liloka Limbo.