SIBBINDA – Undi wa nyangela bene babifile ili bayahi ba Sibbinda neba totomokezi sipatelanyana la Mukibelo kufitisa bunyemi bwa bona kuyomumwi wa baoki ba balalu benebali fa musebezi ka kuakalezwa kuli na chisize muganteli wa silelezo ni mezi a bila.
Muoki u akalezwa kuli u tisize kolofalo yetuna ahulu ya kucha kwa lilama za mba ya kumuganteli yo naizo mubiza kuli a tofa likalafo kwa bakuli ba ne ba libelezi, taba ya nangile yena kuba ye fosahezi. Siundwanyambe ne sitibezwi kukela mwahali a sipatelanyana ki baganteli ba silelezo ba babeli bao ne bakwalile makenelo kaku lotela kwateni. Mapokola ne babizizwe kukona kuyo kalimela mi muoki na tobisizwe mwa silelezo yetuna. Muoki u tamelelizwe kuli na yubile muganteli mezi a bila, nako ya yo mubiza kuli a yo fa likalafo kwa bakuli bao ne bali mwa mubamba nako ye telele. Ka kutalusa mikwa ya muoki ya situhu, bayahi ba talusize kuli kezo ya mafelelezo ki ya zemwi za linyandiso ze ne ba fumana kuzwelela ku muoki kuzwelela lilimo zepeli zefelile. Ka kuikambota ni yena fa muhala, muoki Ronnety Mata Liswaniso u hanile ku alabela fa taba yeo, ka kutaluseza mubihi wa makande kuli a zamaye koo kwa fumani litaba zeo, mi a lula foni yahae ka kuinata fafasi. Muzamaisi wa baoki kwa sipatelanyana Lawrence Mapulanga u ize, nako ya kezahalo yeo nasiyo fa musebezi mi na tokwa nako kuli a nyakisisa taba maneku kaufela pili a sika alabela kale kuyona ni kunga muhato.”Neibihilwe kuna, mi niyena muoki u tazelelize taba ya kuli sitangu seo siezahezi kono nesi katato ya hae. La Mubulo lutabe lubile ni mukopano, kuli lu utwe kuyo mumwi ni yomumwi,” kwa talusa Mapulanga. Nako ye ba izo fita ba mutende wa New Era kwa sitangu seo, nyangela ya bayahi bao nebanyemile neba kubukani fa makenelo a sipatelanyana sa Sibbinda inze baikumbuta muoki ya na ipakezi mwandu. Babamwi kwa bayahi neba talusa kuli muoki ki ya tokwa ni zibo ya musebezi kuamana ni sizwale.
“Lubile ni pilutelele nako ye telele ni muoki . Mwanana yomumwi nakile a latehelwa bupilo bwa hae bakeni sakuli nafilwe ndonga yefosahalile.
Hakoni kueza taba ye cwana,” kwa bulela muyahi yomumwi ya nafelile pilu.
Mushemi ya na tisize bana ba hae kwa likalafo, u ize na litezi likalafo nako ye telele, seo sitisize munkanteli ku yobiza muoki, mukwa o tisize kozi. “A lu zibi kapa ki kuli kona a na zwa fa kuzuha, kuli mwendi na sa tabeli ku zusiwa. Ni tile fa ka nako ya 10 kakusasana. Buňata bwa batu se ba bilaezi kuamana mwa ezeza batu. Nako ye nitisa bana baka kwa likalafo, lu tilo litela nako yetelele, mi nakupa muganteli kubiza muoki. A ni zibi ze izo ezahala kafoo, ni utwile feela mihuwo,” kwa bulela mushemi. Muganteli wa silelezo, Fredrick Muhupulo, u ize u zo biza muoki yo na sali mwa ndu ya hae kukona kuto alabela kwa bakuli mi hakoni ku utwisisa seo sitisize muoki kumu yuba mezi a chisa. “Ne nili fa musebezi. Ni keni mwahali kuyo taluseza muoki kuli sichaba simulitezi. Kacwalo na satabeli kuli ni mubize mi a ni yuba mezi a chisa. Ni makalile ahulu kataba ya kuli u kona kueza taba ye cwana,”kwa talusa Muhupulo. Ka mukwa o cwalo, muganteli ya holofezi, ku izwe u mukwalulezi muzeko ni haike kuli buniti sakata a busika nyakisiswa nako a nekuhatiswa lipiho mwa mutende.