WINDHOEK Nonando okampani ndjoka hayi gandja omikanda dhiihauto noolisinisa ohali ningi oshimaliwa oshindji okuza mAanamibia omayovi mboka taya kongo oombapila dhomahauto, ehangano ndyoka lya pewa otendera yiilonga itali gwanitha po iimpwiyu yalyo. Oomwedhi odhindji konima yiikonga yopaunangeshefa mbyoka ya sikumutha aaniihauto omayovi yi iyuthe kesiku lyahugunina nokufuta N$150 okumona oolisinisa dhawo dhoondondo dhayooloka oshowo N$180 dhi nasha nomambesa nomaloli, aantu oyendji oya geya oshoka oolisinisa dhawo oompe inaye dhi pewa natango. Epangelo sho lya ningi omapulapulo noNaTis, ndjoka ya pewa oshinakugwanithwa shegandjo lyoolisinisa dhomatuwa, ehangano ndika olundji oli na omaipopilo ogendji. Omolwomanyenyeto ga lunda, onkalo ndjika oya thiminike oRoads Authority, moka oNaTis yi li oshitayi, yi tameke okuthiminika ehangano ndika lyopaumwene li gwanithe po shoka tashi monika ngashingeyi sha fa omauvaneko giifundja, sho itapu monika ekandulopo lyontumba. Moonkundathana noshifo shika, menindja goshitopolwa shoRoads Authority, Wilfried Brock okwa holola eyemato shi nasha niilonga mbika tayi ende kashona mokugandja oolisinisa dholudhi lwuukalata. Omwedhi Juli omvula ya zi ko, ombelewa yoolisinisa oya tokola okuhulitha po okulonga uukalata woolisinisa inau nyolwa sha konima sho kwa monika kutya ongushu yuukalata oyi li pevi noonkondo. Oshifo shika oye shi tala ko kutya ehangano ndyoka lya pewa otendera ka li na iiyakulitho nowino okundulula uukalata wongushu ya pumbiwa. Mokutala kutya ehangano ndika olyo awike moshilongo aniwa tali vulu okulonga oshilonga shika, Brock okwa tseyithile oshifo shika kutya omathiminiko nomanyenyeto okuza moshigwana oga tula ombelewa ye monkalo ombwinayi. Shika osha thiminike oRoads Authority yi pitike ashike elongo lyuukalata mboka wongushu yopevi nohau vulu okulongululwa paulingilingi nuupu. “Okakalata kongushu inayi ihwapo oke vule kape na sha. Kashi nasha nuupyakadhi wuukolele wokakalata, nenge uuwanawa woopelesenda 100 oku shi talela mongushu yako, ihe oshi li hwepo okugandja oopelesenda 90 dhongushu yuukalata shi vulithe pwaa na opelesenda yasha,” osho ta ti. Nonando oshilalakanenwa shoRoads Authority, okugandja uukalata wongushu yi ihwapo thilu, Brock ota ti ombelewa ye otashi tsikile nokuthiminika ehangano ndyoka lya pewa otendera li endeleleke omukalo gokulonga omikanda dhongushu. Kakele oolisinisa nonando dha kala tadhi gandjwa ethimbo alihe ndyoka, omvula ashike ya za ko oRoads Authority ya dhimbulula kutya ongushu yuukalata ndjoka ya pulwa mokondalaka hayo. Brock ina vula okuya muule womauyelele, ta ti iinima yimwe oya nika uutekenika oshowo omatompelo gegameno. Ehangano lyoyene lyokulonga uukalata otali ti omakatasho otaga etwa ketompelo ndyoka kutya iilongitho yokulonga uukalata ohayi zi koFrance. Brock natango okwa tumbula kutya “oya tendera okampani” ta ti otashi ka kwata oomwedhi dhontumba okulongulula ishewe uukalata nokutuma nosikepa iilongitho yi ye huka (moNamibia).” Okutala komakatasho, aakwashigwana oya gandja ethaneko koNaTIS yi dhiladhile okugandja po iilonga mbika kokampani yilwe. Omupya omunene, Brock ota ti, ngeno okwa li pe na ompito yilwe andola okwe shi ninga nale, ihe pethimbo ndika kape na we ehangano limwe moNamibia ndyoka tali vulu okulonga hwepo iilonga mbika. Okondalaka, oya shainwa nehangano ndyoka edhina lyawo inali vulu okutumbulwa, lya ulika ongushu yuukalata okwiiyutha komautho gwontumba gopaigwana. Euvathano ndyoka olya shaininwe muSeptemba 2002, notali kwishi omvula tayi landula. “Tse otatu yi komeho notendera ndjoka ompe. Oshoka pethimbo ndika kape na we ompito yilwe,” osho Brock ta ti. Kaantu oohandimwe mboka oolisinisa dhawo dhopakathimbo dha kwisha nenge dhi li pokukwisha, Brock ota ti aantu mbaka naya ye kombelewa yawo noku ka pewa oolisinisa dhopakathimbo oompe oshali ano itaya futu sha, oshoka ehangano itali vulu okupitika aantu ya hinge kaa ye na oolisinisa. “Ondi na etegameno kutya ongushu yuukalata otayi ka hwepopala mbala,” osho Brock tashi shilipaleke. Kumboka ya mona nale omikanda dhawo omanga ehulithopo inali ningwa, Brock ota ti, “kashi na oshilonga oshoka oolinisadhika otadhi ka kwatelwa mo, oshoka otwa hala ashike okushilipaleka ongushu yi kale pomithika dhopaigwana, notwa hala ongushu ya gwana oshimaliwa shoka hashi futwa.” Pethimbo lyelundululo lyoolisinisa, oombapila dhokuhinga 153 000 odha ningululwa, omanga oolisinisa dholudhi dhokakalata dhi thike 16 000 lwaampoka dhi na natango okulongwa.