I Kae Matundu-Tjiparuro OTSAU, OTJAUANA Omunane wo mbazu wa Tsau, Ombara Ebineng Potsoeng, matja Ovaherero nOvambanderu ngavekengeze kutja otjisuta tjimatjiya kuwo atjiharire otjiwova nuwina atji hevetua kumwe. Potsoeng ondunge youpanga indji weiyandjere omayuva womasuviro ngazuko pomayamberero wombura indji werapi rotjiserandu. Omayamberero inga yekarako ombura aihe nu nai yahingi ozombura ine okuuta mo 2003. Omayamberero inga yezemburuka ozombangane ndawa movita vyombiririro yohuurire yOvandoitji. Ovita imbi vyatjita kutja otjihupe tjOvaherero nOvambanderu mbyevihuka vekondje nomutenya, onyota neheke ra Maheke nokuti onguza kwa Kalahari nu koruseinina tjiva avevaza Otsau muvaserikisiwa rutenga otjvataure vovita. Potsoeng wayetere ombinika yOmbara yOvambatawana, Kealetile Moremi. Ovambatawana oovature va Tsau mOrukondua rwa Gantsi mbasekirisa Ovaherero nOvambanderu tjaa vetaure Otjitiro Otjindjandja tjOvandoitji. Muwo mwari Ombara yOvaherero oruveze indo, Samuel Maharero. Potsoeng warakizire Ovaherero nOvambanderu kutja ngaverihongere kotjisanekero tjozombwa mbari ndaa zerwire etupa nungunda amazeu yarwe oitjatatu aiya ai hakana etupa indi. Watjere nandarire kutja ozondekurona zOvaherero nOvambanderu nderiko nai kandata mOtjitiro Otjindjandja, ohepero kuzo otjorutanga rovati mbapandjara ominyo nowini mena rokutja Samuel Maharero wa punguhirwa owo. Munao otjeri osemba okutunga ozombindi okuzemburukira ko imba mbata movita imbi okuraisa ondangu komeripunguhiro wao. Mehungi re ndayandjerwe iyo owo kokunene kwe, Jonathan Katjimune, Ombara Otjitambi yOvaherero, Kuaima Riruako, wayarukire mozondambo za Potsoeng okurakisa otjiwana okukengeza ohani. “Otjiihamise tjinene ndinondi okoo kutja Ovaherero vahanika nganduu tjiveyandja ohoni. Muwo muno hani nu verarakanwa iyovanavita vOvaherero mokati kawo,” Riruako watjere. “Ouzeu mburi mOvaherero kanaa uzengururwa iyovanane vombazu mbavarwa kourike wao nu tjingetjo wina ka naa uzengururwa iimbo mbehiyazemburukwa kourike wao. Atuhe matuhepasana mondando indjo nu memunu kutja tuakaha pupayenene okukengeza. Katuyakaha?,” watjere nokupura. Mowinyo imbwi Riruako otjanangere ovanane ovakwao vombazu akuhe kuveri, Ovaherero nOvambanderu, ombura indji okupaha eyuvva ndumaveya pamwe okuyandeka ohani. Watjere orukosi rotjisuta maru rire ondoneno uriri indu auhe tjayandja omasa we kongondjero indji. “Mohani matupandjara nu mombwaneno matutaara,” watjere. Ombara Kaihepovazandu Maharero, mehungi re nda hungiririrwepo i Cleophas Mutjavikua, nari kamburire kehungi ra Riruako nawina komatjivisiro womatoororero wokomiti ya Tjauana yOtjitiro Otjindjandja yopokai koruveze, watjere ngapezemburukwe kutja Otjauana na Namibia muna ovanane mbazemburukwa kotjiveta kehi yozoveta zomahi ayeevari inga. Ovanane mbazemburukwa imba omberi mokomiti yOtjitiro Otjindjandja ndjatjere “okomiti yozombara” ndjiheri indji “yOmbara imwe”. Mapemunika ayo aa hungirire komanasaneno ngeri po nai pokati kozokomiti mbari zOtjitiro Otjindjandja mo Namibia aihe ndjikondja kutja arire ndjarire oyo poo oini yOtjitiro Otjindjandja. Watjere movahona mberi mOkomiti wina ndjitjiukwa otjo “Komiti ya Puwo,” Omuhona Kaahaka na nOmuhona Kaumo Maharero, aveevari va Tjauana. Watjere nandarire moupeke wazo ozokomiti inda zekara nomatiasaneno. Komurungu watjere ohani mOvaherero mo Namibia ngarire otjina tja Namibia orini nai hwanga Ovaherero momahi wozonganda. Wamunine kutja ohani mOvaherero katjina tjima tjizengururirwa momatuwo wozombongarero nu noukarata ouserandu nungwari otjina tjouti wambeto motjiwana okurituvira kehi yomiti vyao nokuhungira owanyoro. Mutjavikwa wina wayetere epu rerapi rotjiserandu nokutja hapo rasere okukara kehi yaune. Waraisire kutja erapi rotjizemba riri kehi yOuhonapare wOndjuwo yOuhona ya Zeraeua kehi yOmbara Christian Zeraeua ngunda orotjingirine ariri kehi yOuhonapare wOmbazu wOmbanderu kehi yOmbara Munjuku II Nguvauva. Munao erapi rotjiserandu otjirasere okukara kehi yOuvara wOmbazu wa Maharero wOmbara Maharero. Omambo ngatjangwa kerapi indi M.P.S.M mokunyotoroka ngetja: “Mukuru Punaete Samuel Maharero” omakahuke kutja erapi indi oraune. Ovo vihako peke peke momarapi vakahurire ongaro ndjasere okukara momarapi. Muwo mwari Oroitenanda Ngenerara Uueziua Tjivikua, muvyarwe ovingi, ngwarongere ovo muzaro womarapi kutja vasere okwiisanewa otja kovihako vya. Wina warongere ovandu okukara momuzaro womarapi aruhe tjiveri movitjitua vyombazu kutja verire omu-ndu umwe. Watjere Erapi rOtjiserandu oombutiro noondjandero yOvaherero. Okukamburira ku Tjivikua, Koronera Kakuuongarera Kaune watjere erapi indi ora kangamwa nomunene nomutiti, na nguna omuzaro poo nguhinawa. Nandarire kutja uzuva kutja ripaka no-kunyanda eye keyerimuna ama-rinyanda urimuna amaripaka poo ariri movyoruhoze tjimuna omazemburukiro wozombangane ndata movita inga. Watjere otja ndautirwe movita okupangura Ovaherero kuna Ovakwena nOvandoitji, nambano rasere okuwaneka omihoko avihe. Watjere ndinondi erapi rarira ehane nu auhe urirarakana. Munao otjeri ohepero okuyaruka kombutiro yaro naimbi mbirautirirwe. “Ngatuzengise ozondambo zozombara atuhayaruka movina vyozombara,” wapatere nao. Ngunda aperi nao ozonde-kurona zOvaherero nOvambanderu mo Tjauana zapendukire mozombotu zohani ndjiri movoyao va Namibia nazeraisa oukahu kutja kazena kuzara ohani indji no kwiiyandjera okuvehwanga. Munao ongondjeo aihe ndjimaizu ko Namibia okupambaha okuungura kumwe na-wo maikondononwa neho ronguvi kutja onamapiku poo indee. Ondjiziro indji yazu mohani ndjiri mozokomiti zOtjitiro Otjindjandja za Namibia ndekondjisa okurihurisisa komuhoko wa Tjauana. Mapemunika ayo Ovaherero nOvambanderu va Tjauana vekara nonguyu komeho ndjiyeheveyandjere okutara kozokomiti inda moukoto. Munao mokati kao otjimwasekamene ombepo imwe kutja mavetara mozokomiti azeembari inda okurikovisa ohunga noukwatera wazo motjiwana nozondando zazo. Ovaherero nOvambanderu okuza mOtjauana na Namibia vakarere potjivitjitua imbi nOsondaha averire ozohatoi zomakutjuriro wohorongo otjotjiraisiro tjoruzo rOnganda yOuvara wo Tjikatjamuaha/nOtjimaharero. Ombara Maharero omwini wananene oruhindo nduazire mo Namibia mumwari orata Ngauva Kazongominja.